ભારતીય ક્રિકેટ કંટ્રોલ બોર્ડ દ્વારા મહિલા પ્રીમિયર લીગ 2025 (WPL 2025)નો કાર્યક્રમ જાહેર

ભારતીય ક્રિકેટ કંટ્રોલ બોર્ડ દ્વારા મહિલા પ્રીમિયર લીગ 2025 (WPL 2025) નો કાર્યક્રમ જાહેર કરવામાં આવ્યો હતો. આ ટુર્નામેન્ટ 14 ફેબ્રુઆરીથી શરૂ થશે, જ્યારે ફાઇનલ મેચ 15 માર્ચે રમાશે. આ વખતે ટુર્નામેન્ટ કુલ ચાર શહેરોમાં રમાશે. મહિલા પ્રીમિયર લીગ 2025માં પાંચ ટીમો વચ્ચે કુલ 22 મેચ રમાશે. 

આ વખતે ટુર્નામેન્ટની પહેલી મેચ ડિફેન્ડિંગ ચેમ્પિયન રોયલ ચેલેન્જર્સ બેંગ્લોર અને ગુજરાત જાયન્ટ્સ વચ્ચે રમાશે, જે વડોદરામાં યોજાશે. ફાઇનલ મેચ મુંબઈમાં યોજાશે. ટુર્નામેન્ટ માટેના ચાર શહેરો વડોદરા, મુંબઈ, લખનઉ અને બેંગલુરુ હશે.

ટુર્નામેન્ટની પ્રથમ 6 મેચ બરોડામાં નવા બનેલા BCA સ્ટેડિયમમાં રમાશે. આ પછી ટુર્નામેન્ટ બેંગલુરુ શિફ્ટ થશે, જ્યાં કુલ 8 મેચ રમાશે. આ પછી ટુર્નામેન્ટ લખનઉમાં યોજાશે, જ્યાં 4 મેચ રમાશે. પછી તેના અંતિમ તબક્કામાં ટુર્નામેન્ટ મુંબઈ પહોંચશે. મુંબઈમાં નોકઆઉટ (એલિમિનેટર અને ફાઇનલ) સહિત ચાર મેચ રમાશે.                   

બેંગલુરુમાં પહેલી મેચ મુંબઈ ઇન્ડિયન્સ અને રોયલ ચેલેન્જર્સ બેંગલુરુ વચ્ચે રમાશે. ત્યારબાદ લખનઉમાં પહેલી મેચ યુપી વોરિયર્સ અને ગુજરાત જાયન્ટ્સ વચ્ચે રમાશે. મુંબઈના છેલ્લા તબક્કાની પહેલી મેચ મુંબઈ ઈન્ડિયન્સ અને ગુજરાત જાયન્ટ્સ વચ્ચે રમાશે. ટુર્નામેન્ટની મહત્તમ 8 મેચ બેંગલુરુમાં યોજાશે. ટુર્નામેન્ટની બધી મેચો સિંગલ હેડર હશે, એટલે કે એક દિવસમાં ફક્ત એક જ મેચ રમાશે.