સુરત: પાંડેસરામાં મકાનમાં ગેસ સિલિન્ડર લીક થતા 5 લોકો ગૂંગળાયા, એક કિશોરીનું મોત

સુરતના પાંડેસરા વિસ્તારમાં વડોદ ગામ ખાતે રાત્રીના પરિવાર સૂતો હતો તે દરમ્યાન LPG ગેસ સિલિન્ડરમાંથી લીકેજ થયો હતો.સવારે નજીકમાં રહેતા સંબંધી જગાડવા જતા ઘરમાંથી 5 લોકો બેભાન મળી આવ્યા હતા જે પૈકી એક કિશોરીનું મોત નીપજયું છે

સુરતના પાંડેસરા વિસ્તારમાં આવેલ વડોદ ગામ ખાતે રહેતા મનીકાંત યાદવ પાંડેસરા મિલમાં કામ કરી પરિવારનું ગુજરાન ચલાવે છે. રાત્રી દરમ્યાન મનીકાંત કામ પર ગયો હતો દરમિયાન મનીકાંતના પરિવાર સહિત મોટા ભાઈના પુત્રો મળી 5 લોકો ઘરમાં સૂતા હતા તે સમયે ઘરમાં રહેલ LPG સિલિન્ડર લીકેજ થયો હતો.રાત્રિ દરમ્યાન રૂમના દરવાજા બંધ હાલતમાં હતા અને પરિવાર સૂતો હતો તે દરમ્યાન ગેસ લીકેજ થતા ઘરમાં સુતેલા 5 લોકો બેભાન થઈ ગયા હતા.સવારે પાંચ વાગે મોટા ભાઈ તેમની દીકરીને જગાડવવા જતા દરવાજો ખુલ્યો ન હતો જેથી દરવાજો તોડી પાંચ લોકોને બહાર કાઢવામાં આવ્યા હતા ત્યાર બાદ સીધા સિવિલ હોસ્પિટલમાં ગંભીર હાલતમાં સારવાર અર્થે ખસેડાયા હતા.જેમાં 14 વર્ષીય કિશોરી અંજલિ શ્રીકાંત યાદવનું મોત થઈ જતા પરિવારમાં ગમગીની જોવા મળી હતી