સુરત : IT એન્જીનીયરના રહસ્યમય આપઘાતની ઘટનાથી ચકચાર,વાર્ષિક 50 લાખના પગારદાર એન્જીનીયરે શા માટે ભર્યું અંતિમ પગલુ,ઘુંટાતું રહસ્ય!

• સોફ્ટવેર એન્જીનીયરનાં આપઘાતનું ઘુંટાતુ રહસ્ય

• વાર્ષિક 50 લાખના પગારદાર એન્જીનીયરે કર્યો આપઘાત

• દુકાનમાંથી છરો ખરીદતા સીસીટીવી પણ આવ્યા બહાર

• પોતાના શરીર પર જાતે જ ઘા કર્યા હોવાનું પોલીસનું અનુમાન

• પોલીસે અંતિમ ચિઠ્ઠી કબ્જે કરીને શરૂ કરી તપાસ

સુરતમાં સોફ્ટવેર એન્જીનીયર તરીકે ફરજ બજાવતા 35 વર્ષીય યુવાનનો વેસુની હોટલમાંથી નીચે પટકાયા બાદ મોતને ભેટ્યો હતો,જોકે તેને શરીર પરથી મલ્ટીપલ ઇજાના નિશાન પણ મળી આવ્યા હતા.તેને  દુકાનમાંથી તીક્ષ્ણ છરી પણ ખરીદી હોવાના સીસીટીવી પણ બહાર આવ્યા છે,ત્યારે આ આત્મહત્યાની ઘટનામાં રહસ્ય ઘૂંટાયું છે.

સુરતમાં વેસુની હોટલમાંથી નીચે પટકાયા બાદ ઇજાગ્રસ્ત અવસ્થામાં મળેલા ડુમસ રોડના સોફ્ટવેર એન્જીનીયરે આત્મહત્યા કરી હોવાની ઘટનાએ રહસ્યના વમળો સર્જ્યા છે. મૂળ મહેસાણામાં આવેલા ઉંઝાના વતની અને હાલ સુરત મગદલ્લા રોડ પર આવેલ વીરભદ્ર હાઈટ્સમાં રહેતા 35 વર્ષીય અક્ષત જીજ્ઞેશભાઈ શાહ પત્ની અને દોઢ વર્ષનો પુત્ર, માતા-પિતા અને ભાઈ સહિતના પરિવાર સાથે રહેતો હતો.

બે વર્ષ પહેલા જ લગ્ન થયા હતા અને પત્ની ડોક્ટર છે. અક્ષય બેંગ્લોર આઈઆઈટીમાં પાસ આઉટ થયેલો છે. અક્ષત બેંગ્લોરની ખાનગી કંપનીમાં સોફ્ટવેર એન્જિનિયર તરીકે છેલ્લા ત્રણ વર્ષથી વર્ક ફ્રોમ હોમથી કામ કરતો અને તેનો વાર્ષિક પગાર 50 લાખ રૂપિયા હતો.તેમના પિતા મુકેશભાઇ પણ ખાનગી કંપનીમાં નોકરી કરે છે.

સોફ્ટવેર એન્જિનિયર અક્ષત શાહ ગત મંગળવારે બપોરે ઘરેથી ઓફિસના કામ માટે જવાનું કહીને નીકળ્યો હતો. દરમિયાન સાંજે પાંચ વાગ્યાના અરસામાં વેસુ વિસ્તારની હોટલના  ભોંયતળિયે ગંભીર ઈજાગ્રસ્ત હાલતમાં મળી આવ્યો હતો. જેમાં તેના શરીરના ગળા, હાથ અને પગમાં ચાકુના ઘા મારેલ હતા. શંકાસ્પદ આ બનાવ અંગે વેસુ પોલીસને જાણ કરતા ઘટના સ્થળે દોડી જઈને તપાસ હાથ ધરી હતી, પોલીસને એક સુસાઇડ નોટ મળી આવી હતી, જેને કબજે કરી છે.

અક્ષત શાહના મૃતદેહનું પોલીસે નવી સિવિલ હોસ્પિટલમાં ફોરેન્સિક પોસ્ટમોર્ટમ કરાવ્યું હતું. જેમાં તેના શરીર ઉપર મલ્ટીપલ ઇજા, ચોથા માળેથી પડતું મુકતા તેના માથા, જાંઘના ભાગે ઇજા થતા મોત નિપજયુ હતુ. જેમાં તેણે આપઘાત કર્યો હોવાનું પ્રાથમિક રિપોર્ટમાં જાણવા મળ્યું છે. છતાં મૃતકના પરિવાર દ્વારા તેની હત્યા કરવામાં આવી હોવાના આક્ષેપ કરતાં પોલીસે મોબાઈલ ફોન કબ્જે કરીને કોલ ડિટેઇલ અને સીસીટીવી કેમેરાના ફુટેજના આધારે વધુ તપાસ શરૂ કરી છે.

પોલીસ દ્વારા હાથ ધરવામાં આવેલી તપાસમાં મૃતક અક્ષત એક હોટલમાં જતો સીસીટીવી ફૂટેજમાં કેદ થયો હતો. સાથે જ  ચોથા માળેથી નીચે પટકાયો હોવાનું પણ જાણવા મળ્યું છે. આ સાથે જ પોલીસ તપાસમાં અક્ષતે હોટલની નજીકમાં જ આવેલી એક દુકાન પરથી રેમ્બો છરાની ખરીદી કરી હોવાનું સામે આવ્યું છે. જેના સીસીટીવી પણ બહાર આવ્યા છે.

વેસુ પોલીસની તપાસમાં જાણવા મળ્યું હતું કે અક્ષત જે હોટલની રૂમમાં રોકાયેલો હતો તે રૂમનું બાથરૂમ લોહીથી ખરડાયેલું હતું. તેના રૂમમાંથી એક મોટું ચપ્પુ પણ મળ્યું હતું અને તે પણ નવું જ ખરીદેલું હતું. પોલીસને અક્ષત પાસેથી એક બેગ પણ મળી આવી હતી. જેમાં લેપટોપ અને મોબાઇલ ફોન મળી આવ્યા હતા. આ સાથે એક ડાયરી, એક જીન્સ, થોડાક રોકડા રૂપિયા અને એક પર્સ મળી આવ્યું હતું. ડાયરીમાં સુસાઈડ નોટ પણ લખેલી હતી. જેમાં કોઈના પર આક્ષેપ કરવામાં આવ્યા નથી.

સુસાઈડ નોટની હેન્ડરાઇટિંગ તેના જુના લખાણ સાથે મેચ કરવામાં આવી રહી છે. અક્ષતે આ પગલુ ભરતા પહેલા કંપનીને એક મેઈલ પણ કર્યો હતો. જેમાં તેની પત્નીનું નામ અને મોબાઈલ નંબર લખ્યો હતો અને વધુમાં લખ્યું હતું કે તેમને જાણ કરી દો કે હું આ હોટલના 404 નંબરના રૂમમાં છું. થેન્ક્સ અને સોરી.

અક્ષતે સુસાઇડ નોટમાં લખ્યું છે કે, મને માફ કરજો મને ગમતું નથી. પરિવારના બધાને હું મિસ કરી રહ્યો છું. જીવનથી થાકી અને કંટાળી ગયો છું. હું અહીં રહેવા લાયક નથી. મને ગૂંગળામણ થાય છે. ડીસીપી વિજયસિંહ ગુર્જરે સુસાઇડ અંગે જણાવ્યું હતું કે, અક્ષતે સુસાઈડ નોટમાં બધાને પોતાના જીવન અંગે નિરાશા જાહેર કરી છે. પરિવારજનોની માફી માંગી છે. સુસાઈડ નોટમાં પરિવારના કે બહારના કોઈની ઉપર આક્ષેપ કે પ્રતિઆક્ષેપ કરવામાં આવ્યો નથી.