સુરેન્દ્રનગર : ભારત ભ્રમણ વેળા વિદેશી યુવતિ આવી પહોચી લીંબડી, પોતાનું નામ રાખ્યું ભૂમિ

ફ્રાન્સની 27 વર્ષની યુવતી પુરા ભારતભરમાં લ્યુના ઉપર પ્રવાસ ખેડી રહી છે, જે સુરેન્દ્રનગર જિલ્લાના લીંબડી સ્થિત શ્રી રામરતન ગીરી બાપુના આશ્રમે દર્શને આવી પહોચી હતી.

"જેવા દેશ, એવા વેશ"એ કહેવત તો આપણે સૌ કોઈએ સાંભળી હશે પણ આ કહેવતને સાર્થક કરે તેવું દ્રશ્ય સુરેન્દ્રનગર જિલ્લાના લીંબડી સ્થિત આવેલા શ્રી રામરતન ગીરી આશ્રમ ખાતે જોવા મળ્યું હતું. છેલ્લા 2 વર્ષથી ભારતમાં રહી એક સેકેન્ડ હેન્ડ લ્યુના પર પુરા ભારતનો પ્રવાસ ખેડી રહી ફ્રાન્સની 27 વર્ષીય યુવતી લીંબડી ખાતે રામરતન ગીરી બાપુની સમાધીના દર્શને આવી પહોચી હતી.

ભારતીય સંસ્કૃતિ અને હિન્દૂ ધર્મ પ્રત્યે ભારે આકર્ષણ ધરાવતી ફ્રાન્સની અગેથે પોતાનું નામ પણ ભૂમિ રાખ્યું છે. ભૂમિ અત્યાર સુધીમાં પંજાબ, હરિયાણા, રાજસ્થાન, ધર્મશાલા તેમજ દક્ષિણ ભારતનો પ્રવાસ કરી ચુકી છે. ગુજરાતમાં સોમનાથ, ગિરનાર, વિરપુરના દર્શન કરીને લીંબડીની મુલાકાત લીધી હતી. તમામ ધાર્મિક સ્થળોએ પરિચય મેળવી ત્યાં વગર કોઈ દાન મેળવ્યા વગર ચાલતા અનક્ષેત્રના ખૂબ વખાણ કર્યા હતા. તેમજ ગુજરાતના લોકો ખૂબ જ માયાળુ અને ઈમાનદાર છે, તેવા પ્રતિભાવો આપ્યા હતા. તૂટ્યું ફૂટ્યું હિન્દી બોલતી આ વિદેશી યુવતી લીંબડી ખાતે સૌના આકર્ષણનું કેન્દ્ર બની હતી.