વડોદરા જિલ્લાના સાવલી તાલુકાના સમગ્ર શિક્ષામાં સી.આર.સી કોડિનેટર તરીકે મુકેશ શર્મા ભાદરવા ખાતે ફરજ બજાવે છે. જેમને સ્વચ્છ ભારત મિશન અભિયાન હેઠળ સ્વચ્છતાના કાર્યક્રમમાં મિશન મોડથી સરાહનીય કામ કર્યું છે. તાજેતરમાં ગાંધીનગર ખાતે પ્લાસ્ટિક મુક્ત શાળા મહોત્સવ અભિયાન કાર્યક્રમ યોજવામાં આવ્યો હતો. જેમાં વડોદરા જિલ્લામાંથી મુકેશ શર્માને વર્લ્ડ વાઈડ બુક ઓફ રેકોર્ડ એવોર્ડ એનાયત કરવામાં આવ્યો હતો. મુકેશ શર્માને વર્ષ 2020માં રાજ્ય સ્તરે શ્રેષ્ઠ શિક્ષકનો એવોર્ડ પણ મળ્યો હતો.
વડોદરા જિલ્લામાં પ્લાસ્ટિક મુક્ત શાળા મહોત્સવ હેઠળ પીપળીયા પ્રાથમિક શાળા નિવૃત શિક્ષક દીલિપભાઈ, નંદેસરી ગ્રામ પંચાયતના તલાટી ક્મ મંત્રી ભાવિશા પ્રજાપતિ અને ખાનગી નોન ગ્રાન્ટેબલ પ્લે સેન્ટર સ્માર્ટ કીડ સંસ્થાના કવિતા વ્યાસને પણ વર્લ્ડ વાઇડ બુક ઓફ રેકોર્ડ એવોર્ડથી સન્માન કરવામાં આવ્યું હતું. મુકેશ શર્મા દ્વારા સ્વચ્છતા હી સેવા અભિયાન હેઠળ છેલ્લા 10 વર્ષોથી શાળાના શિક્ષકો અને સમાજ માટે જાગૃતિના અભિયાનમાં વિવિધ નવતર પ્રયોગ કરવામાં આવ્યા છે.
શાળાઓમાં સ્વચ્છતા પખવાડિયાની ઉજવણી, વ્યક્તિગત અને જાહેર શૌચાલયની સ્વચ્છતા જાળવણી અને તેનો ઉપયોગ હેન્ડ વોશ ડેની ઉજવણી તેમજ પ્લાસ્ટિકની થેલીની જગ્યાએ કાપડની થેલીનો ઉપયોગ અને પ્લાસ્ટિકથી થતા નુકસાન અંગેની શાંત ગતિની ચળવળ દ્વારા સમાજમાં એક નવી ક્રાંતિકારી પહેલથી કામગીરી કરી છે. આ કામગીરી એક દીવાદાંડી સમાન હોય સમાજના અનેક લોકોને પ્રેરણા પૂરી પાડી છે.
જેની વિવિધ સરકારી શિક્ષણ વિદો અને નગરજનોમાં તેની નોંધ લેવામાં આવેલી છે. મદદનીશ પ્રાથમિક શિક્ષણ સચિવ પુલકિત જોશી, પૂર્વ નાયબ નિયામક એમ.કે.રાવલ તેમજ દિવા સ્વપ્ન ફિલ્મના ડાયરેક્ટર નિમેષ પ્રજાપતિના હસ્તે વર્લ્ડ વાઇડ બુક ઓફ રેકોર્ડનું પ્રમાણપત્ર અને શીલ્ડ એનાયત કરી તેઓને સન્માનિત કરાયા હતા. આ પ્રસંગે ગાંધીનગરના વિવિધ ક્ષેત્રના અગ્રણીઓ સહિત સામાજિક સંસ્થાના આગેવાનો ઉપસ્થિત રહ્યા હતા.