મેક્સિકોમાં ક્રિસમસની ઉજવણી દરમિયાન શોક: બસ અકસ્માતમાં બાળક સહિત 10ના મોત

મેક્સિકોમાં ક્રિસમસની ઉજવણી દરમિયાન એક ભયાનક માર્ગ અકસ્માતે સમગ્ર વિસ્તારમાં શોકનો માહોલ છવાઈ ગયો છે. પૂર્વી મેક્સિકોના વેરાક્રુઝ રાજ્યમાં 24 ડિસેમ્બરના રોજ એક પેસેન્જર બસ પૂર ઝડપે જઈ રહી હતી ત્યારે અચાનક પલટી મારી ગઈ, જેના પરિણામે એક બાળક સહિત કુલ 10 લોકોના કરૂણ મોત નીપજ્યા છે, જ્યારે 32થી વધુ મુસાફરો ગંભીર રીતે ઘાયલ થયા છે. તહેવારના દિવસે બનેલી આ દુર્ઘટનાએ અનેક પરિવારોની ખુશી માતમમાં ફેરવી દીધી છે અને સમગ્ર રાજ્યમાં શોકની લાગણી ફેલાઈ ગઈ છે.

વેરાક્રુઝ પ્રશાસને ગુરુવારે આ અકસ્માત અંગે વિગતવાર માહિતી આપતા જણાવ્યું કે, ઘટના જોન્ટેકોમાટલાન (Zontecomatlan) કસબા નજીક બની હતી. આ બસ મેક્સિકો સિટીથી ચિકોન્ટેપેક ગામ તરફ જઈ રહી હતી અને માર્ગમાં વળાંક પાસે અચાનક નિયંત્રણ ગુમાવતાં પલટી ગઈ હતી. પ્રત્યક્ષદર્શીઓના જણાવ્યા અનુસાર, બસની ઝડપ ખૂબ જ વધારે હતી, જેના કારણે ડ્રાઈવર વાહન પર કાબૂ રાખી શક્યો ન હોવાની આશંકા વ્યક્ત કરવામાં આવી રહી છે. જોકે, તંત્રનું કહેવું છે કે તપાસ પૂર્ણ થયા બાદ જ સ્પષ્ટ થશે કે અકસ્માતનું મુખ્ય કારણ અતિશય ઝડપ હતી કે પછી બસમાં કોઈ યાંત્રિક ખામી સર્જાઈ હતી.

જોન્ટેકોમાટલાન મેયર ઓફિસ દ્વારા જારી કરાયેલા સત્તાવાર નિવેદનમાં જણાવવામાં આવ્યું છે કે, આ દુર્ઘટનામાં 9 પુખ્ત વયના લોકો અને એક બાળકના મોતની પુષ્ટિ કરવામાં આવી છે. સ્થાનિક પ્રશાસને ઘાયલ થયેલા 32 મુસાફરોની યાદી પણ જાહેર કરી છે અને તેઓ કઈ-કઈ હોસ્પિટલમાં સારવાર હેઠળ છે તેની વિગતો પરિવારજનોની સુવિધા માટે જાહેર કરવામાં આવી છે. ઘાયલોમાંથી કેટલાકની હાલત ગંભીર હોવાનું પણ જણાવાયું છે, જેથી મૃત્યુઆંક વધવાની શક્યતા નકારી શકાય તેમ નથી.

આ અકસ્માત બાદ રાહત અને બચાવ કામગીરી માટે પોલીસ, ફાયર બ્રિગેડ અને એમ્બ્યુલન્સ ટીમો તાત્કાલિક ઘટનાસ્થળે પહોંચી હતી. બસમાં ફસાયેલા મુસાફરોને બહાર કાઢવા માટે ભારે જહેમત ઉઠાવવી પડી હતી. સ્થાનિક લોકો પણ બચાવ કામગીરીમાં જોડાયા હતા. ઘટનાને પગલે આસપાસના વિસ્તારોમાં ટ્રાફિક અસરગ્રસ્ત થયો હતો અને લાંબા સમય સુધી માર્ગ બંધ રાખવો પડ્યો હતો.

ઉલ્લેખનીય છે કે, મેક્સિકોમાં છેલ્લા કેટલાક સમયથી માર્ગ અકસ્માતોની સંખ્યામાં ચિંતાજનક વધારો જોવા મળી રહ્યો છે. ખાસ કરીને બસ અને ટ્રક જેવા ભારે વાહનો અતિશય ઝડપ, ડ્રાઈવરની બેદરકારી અને યોગ્ય મેન્ટેનન્સના અભાવને કારણે વારંવાર જીવલેણ અકસ્માતોનો ભોગ બને છે. તાજેતરની આ ઘટના બાદ ફરી એકવાર માર્ગ સુરક્ષા, વાહનોની તકનિકી તપાસ અને ઝડપ નિયંત્રણ અંગે સખત પગલાં લેવાની માંગ ઉઠી રહી છે.