ચીનના યુનાનમાં ટ્રેન ટેસ્ટિંગ દરમિયાન મોટી દુર્ઘટના, 11 રેલવે કર્મચારીઓના મોત

ચીનના દક્ષિણ પ્રાંત યુનાનમાં ગુરુવાર સવારે એક ગંભીર ટ્રેન દુર્ઘટના બની હતી, જેમાં 11 રેલવે કર્મચારીઓના મોત થયા છે અને બે લોકો ગંભીર રીતે ઈજાગ્રસ્ત થયા છે. ભૂકંપનાં સંકેતો માપવા માટે ઉપયોગમાં લેવાતી ટેસ્ટિંગ ટ્રેન (Testing Train) જ્યારે ટ્રેક પર ચાલી રહી હતી, ત્યારે અચાનક તે જ ટ્રેક પર કામ કરી રહેલા રેલવે કર્મચારીઓને કચડી નાખ્યાં હતાં. ઘટનાની ગંભીરતા એટલી વધારે હતી કે મોટાભાગના કર્મચારીઓએ ઘટનાસ્થળે જ જીવ ગુમાવ્યા.

આ દુર્ઘટના યુનાનની રાજધાની કુનમિંગ સ્થિત લુઓયાંગ ટાઉન રેલવે સ્ટેશન નજીક આવેલા વળાંકવાળા ટ્રેક વિસ્તારમાં બની હતી. અહેવાલો અનુસાર, ટેસ્ટિંગ ટ્રેન સ્ટેશનની અંદર આવેલા એક વળાંકથી પસાર થઈ રહી હતી ત્યારે દૃશ્યતામાં ઘટાડાને કારણે ટ્રેક પર કામ કરતા કર્મચારીઓ દેખાઈ શક્યા નહોતા. આ અથડામણ એટલી અચાનક અને ભયાનક હતી કે બચાવ માટેનો સમય જ મળ્યો નહોતો. ઘટનાના તુરંત બાદ રેલવે અધિકારીઓ અને રેસ્ક્યૂ ટીમો સ્થળ પર પહોંચી ગયા હતા અને ઈજાગ્રસ્તોને તાત્કાલિક હોસ્પિટલ ખસેડવામાં આવ્યા છે.

અધિકારીઓએ જણાવ્યું છે કે સ્ટેશન પર सामान्य રેલવે સેવા ફરી શરૂ થઈ ગઈ છે, પરંતુ દુર્ઘટનાનું ચોક્કસ કારણ જાણવા માટે તપાસ ચાલુ છે. રેલવે પ્રશાસને સ્પષ્ટ કર્યું છે કે આ ઘટનામાં જે કોઈની બેદરકારી અથવા ભૂલ સાબિત થશે, તેમના સામે કાયદા મુજબ કડક કાર્યવાહી કરવામાં આવશે. આ દુર્ઘટનાએ ચીનના રેલવે સુરક્ષા માપદંડોને લઈને ગંભીર પ્રશ્નો ઊભા કર્યા છે.