અમેરિકાનો ISIS સામે મોટો પ્રહાર, સીરિયામાં 70થી વધુ ઠેકાણાઓ પર હવાઈ હુમલા

અમેરિકી સૈનિકો પર થયેલા ઘાતક હુમલાનો બદલો લેવા માટે અમેરિકા દ્વારા સીરિયામાં આતંકી સંગઠન ઇસ્લામિક સ્ટેટ (ISIS) સામે એક વિશાળ અને આક્રમક સૈન્ય અભિયાન શરૂ કરવામાં આવ્યું છે.

19 ડિસેમ્બરના રોજ અમેરિકી વાયુસેનાએ સીરિયાના અનેક વિસ્તારોમાં ISISના 70થી વધુ ઠેકાણાઓને નિશાન બનાવી ભીષણ હવાઈ હુમલા અને ભારે તોપમારો કર્યો હતો, જેમાં આતંકીઓના છુપાવાના અડ્ડા, હથિયાર સંગ્રહસ્થળો અને તાલીમ કેન્દ્રોને સંપૂર્ણ રીતે ધ્વસ્ત કરવામાં આવ્યા હોવાના અહેવાલ છે. આ વ્યાપક કાર્યવાહીમાં અનેક ISIS આતંકીઓના મોત થયા હોવાનું પણ જણાવવામાં આવી રહ્યું છે. 

અમેરિકી સેનાએ આ સમગ્ર અભિયાનને “ઓપરેશન હોકઆઈ સ્ટ્રાઈક” નામ આપ્યું છે, જે અંતર્ગત મધ્ય સીરિયામાં આતંકી નેટવર્કની કમર તોડવાનો પ્રયાસ કરવામાં આવી રહ્યો છે. આ ઓપરેશન દરમિયાન અમેરિકાએ તેની આધુનિક સૈન્ય ક્ષમતાનો પુરેપુરો ઉપયોગ કર્યો હતો, જેમાં F-15 અને A-10 ફાઇટર જેટ્સ, અપાચે હેલિકોપ્ટર્સ તેમજ ઘાતક HIMARS રોકેટ સિસ્ટમનો સમાવેશ થાય છે.

ખાસ વાત એ છે કે આ હુમલાઓમાં અમેરિકાને જોર્ડન તરફથી પણ સૈન્ય સહયોગ મળ્યો હતો, જ્યાં જોર્ડનની વાયુસેનાના F-16 જેટ્સે સંયુક્ત રીતે આ મિશનમાં ભાગ લીધો હતો, જેનાથી આ ઓપરેશનનું વ્યાપકતા અને અસર બંને વધી ગઈ છે.

આ આક્રમક કાર્યવાહીની પૃષ્ઠભૂમિમાં 13 ડિસેમ્બરે બનેલી એક ગંભીર ઘટના જવાબદાર હોવાનું જણાવવામાં આવ્યું છે. સીરિયાના પાલમિરા વિસ્તારમાં ISIS દ્વારા કરવામાં આવેલા એક હુમલામાં બે અમેરિકી સૈનિકો અને એક દુભાષિયા (ઇન્ટરપ્રિટર) શહીદ થયા હતા, જેને લઈને અમેરિકામાં ભારે રોષ ફેલાયો હતો.

આ ઘટના પછી પ્રમુખ ડોનાલ્ડ ટ્રમ્પે આતંકીઓને કડક અને જડબાતોડ જવાબ આપવાની ચેતવણી આપી હતી, અને હવે તે ચેતવણીને અમલમાં મૂકતા અમેરિકાએ સીધો સૈન્ય પ્રહાર કર્યો છે. પ્રમુખ ટ્રમ્પે આ હુમલાઓને યોગ્ય ગણાવતા કહ્યું હતું કે અમેરિકા પોતાના સૈનિકોના બલિદાનને ક્યારેય ભૂલશે નહીં અને આતંકવાદ સામે કોઈપણ પ્રકારની નરમી દાખવશે નહીં.

આ સાથે સંરક્ષણ સચિવ પીટ હેગસેથે પણ કડક નિવેદન આપતા જણાવ્યું હતું કે, “અમે અમારા સૈનિકોના લોહીના દરેક ટીપાનો હિસાબ લઈશું. ઘણા ISIS લડાકુઓને ઠાર કરવામાં આવ્યા છે અને જ્યાં સુધી આતંકીઓનો સંપૂર્ણ સફાયો નહીં થાય ત્યાં સુધી આવા હુમલાઓ ચાલુ રહેશે.” ચોંકાવનારી અને મહત્વની બાબત એ છે કે સીરિયન સરકારે પણ અમેરિકાના આ હુમલાઓને સમર્થન આપ્યું છે, કારણ કે તાજેતરના મહિનાઓમાં ISIS ફરીથી સક્રિય બનતું જઈ રહ્યું છે.

હાલ સીરિયામાં અંદાજે 900થી 1,000 જેટલા અમેરિકી સૈનિકો તહેનાત છે, જે સીરિયન સુરક્ષા દળો અને આંતરરાષ્ટ્રીય ગઠબંધન સાથે મળીને ISIS સામેના અભિયાનમાં સક્રિય ભૂમિકા ભજવી રહ્યા છે, અને ‘ઓપરેશન હોકઆઈ સ્ટ્રાઈક’ને આતંકવાદ સામેની લડાઈમાં એક મહત્વપૂર્ણ વળાંક તરીકે જોવામાં આવી રહ્યું છે.