ઇઝરાયલમાં પાર્કિંગમાં પાર્ક કરેલી ત્રણ બસોમાં થયો વિસ્ફોટ

ઇઝરાયલમાં બસોમાં શ્રેણીબદ્ધ વિસ્ફોટ થયા હતા. આ વિસ્ફોટ મધ્ય ઇઝરાયલમાં પાર્કિંગમાં પાર્ક કરેલી ત્રણ બસોમાં થયા હતા. અન્ય બે બસોમાં પણ વિસ્ફોટકો મળી આવ્યા હોવાથી અધિકારીઓને શંકા છે કે તે આતંકવાદી હુમલો હતો.

જોકે, આ વિસ્ફોટોમાં કોઈએ પોતાનો જીવ ગુમાવ્યો નથી અને કોઈ ઘાયલ થયાની કોઈ માહિતી નથી. ગાઝા યુદ્ધવિરામ વચ્ચે ચાલી રહેલા કેદીઓની અદલાબદલી વચ્ચે આ વિસ્ફોટો થયા છે. આ દરમિયાન, ઇઝરાયલના વડા પ્રધાન બેન્જામિન નેતન્યાહૂએ સુરક્ષા બેઠક બોલાવી છે.

ચેનલ ૧૩ ટીવી અનુસાર, પોલીસ પ્રતિનિધિ એસી અહારોનીએ બે વધારાની બસોમાં વિસ્ફોટકો મળી આવ્યા હોવાની પુષ્ટિ કરી. અધિકારીઓએ જણાવ્યું હતું કે પાંચેય બોમ્બ એકસરખા હતા અને તેમાં સમય નક્કી કરવા માટેના ઉપકરણો ફીટ કરવામાં આવ્યા હતા. બોમ્બ ડિસ્પોઝલ સ્ક્વોડ દ્વારા વિસ્ફોટ ન થયેલા ઉપકરણોને નિષ્ક્રિય કરવામાં આવ્યા છે.