વ્હાઇટ હાઉસ નજીક ફાયરિંગ બાદ ટ્રમ્પની કડક કાર્યવાહી, 19 દેશોના ગ્રીન કાર્ડ ધારકોની ફરી તપાસ થશે

વ્હાઇટ હાઉસ નજીક થયેલા ગોળીબારની ઘટના બાદ અમેરિકાના રાષ્ટ્રપતિ ડોનાલ્ડ ટ્રમ્પના પ્રશાસને કડક ઈમિગ્રેશન નીતિઓ તરફ વધુ એક મોટું પગલું ભર્યું છે.

અમેરિકન નેશનલ ગાર્ડ પર થયેલા આ હુમલાનો આરોપી અફઘાન મૂળનો હોવાનું ખુલ્યા બાદ ટ્રમ્પ પ્રશાસને જાહેરાત કરી છે કે અમેરિકા ખાતે વસતા 19 દેશોના ગ્રીન કાર્ડ ધારકોની ફરીથી તપાસ કરવામાં આવશે. આ નિર્ણયને લઈને અમેરિકામાં સુરક્ષા અને ઈમિગ્રેશન બંને મુદ્દાઓ પર તીવ્ર ચર્ચા શરૂ થઈ ગઈ છે.

ટ્રમ્પ પ્રશાસન દ્વારા દર્શાવવામાં આવેલા આ 19 દેશોને અમેરિકી સરકાર પહેલાથી જ 'કન્ટ્રીઝ ઑફ કન્સર્ન'ની સૂચિમાં સમાવી ચૂકી છે. આ યાદીમાં એવા દેશોનો સમાવેશ થાય છે જ્યાં રાજકીય અસ્થિરતા, આતંકવાદ, આંતરિક યુદ્ધ અથવા અતિશય હઠીલા શાસન તંત્રનો દબદબો હોય છે. અહીં ભારતના બે પડોશી દેશો — અફઘાનિસ્તાન અને મ્યાનમાર — પણ સામેલ છે. અફઘાનિસ્તાન હાલ તાલિબાનના કડક શાસન હેઠળ છે, જ્યારે મ્યાનમારમાં સૈન્ય શાસન (જુન્ટા રૂલ) કાર્યરત છે, જેને કારણે ત્યાંથી આવનારા નાગરિક અંગે સુરક્ષાત્મક ચિંતાઓ ઊભી થાય છે.

અમેરિકન નાગરિકતા વિભાગ (USCIS)ના વડા જોસેફ એડલોે પોતાના સત્તાવાર સોશિયલ મીડિયા એકાઉન્ટ પર જાહેરાત કરી કે રાષ્ટ્રપતિ ટ્રમ્પના નિર્દેશ પર આ તમામ 19 દેશોના ગ્રીન કાર્ડ ધારકો—અર્થાત અમેરિકાના સ્થાયી નિવાસીઓ—ની ફરીથી સુરક્ષા ચકાસણી હાથ ધરાશે. એડલોએ જણાવ્યું કે આ કાર્યવાહી રાષ્ટ્રીય સુરક્ષાને મજબૂત બનાવવા અને 'કંસર્ન કન્ટ્રીઝ'માંથી આવેલા લોકોની પૃષ્ઠભૂમિની ફરી તપાસ કરવા માટે જરૂરી બની છે.

ત્રણ અલગ-અલગ ખંડોમાં આવેલા અને રાજકીય રીતે અસ્વસ્થતા ધરાવતા 19 દેશોમાંથી આવેલા ગ્રીન કાર્ડ ધારકોને આ તપાસનો સામનો કરવો પડશે. આ દેશોની યાદીમાં અફઘાનિસ્તાન, બર્મા (મ્યાનમાર), ચાડ,  ગણરાજ્ય, ઇક્વેટોરિયલ ગિની, એરિટ્રિયા, હૈતી, ઈરાન, લિબિયા, સોમાલિયા, સુદાન, બુરુન્ડી, ક્યુબા, લાઓસ, સીએરા લિયોન, ટોગો, તુર્કમેનિસ્તાન, યમન અને વેનેઝુએલા સામેલ છે. ટ્રમ્પ પ્રશાસનની દલીલ છે કે આ દેશોમાં વ્યાપક રાજકીય હિંસા અને આતંકવાદી તત્વોની હાજરીને કારણે સુરક્ષા જોખમ વધી શકે છે.

આ નિર્ણય વ્હાઇટ હાઉસ જેવી અતિ-સુરક્ષિત જગ્યા નજીક થયેલી ઘટના બાદ અમેરિકાની કડક બનતી ઈમિગ્રેશન નીતિનો એક વધુ મહત્વપૂર્ણ સંકેત માનવામાં આવે છે. ટ્રમ્પ પ્રશાસન અગાઉ પણ મુસ્લિમ બહુમતી ધરાવતા અનેક દેશો પર ટ્રાવેલ બેન લાગુ કરી ચૂક્યું છે, અને હવે ગ્રીન કાર્ડ ધારકોની પાછલી તપાસ કરવાનો નિર્ણય અમેરિકામાં વધારે સખત સુરક્ષા નીતિઓની દિશામાં આગળનું પગલું ગણાય છે. આ પગલાંને લઈને દેશમાં રાજકીય વલણો વચ્ચે મતભેદ પણ વધ્યા છે—કેટલાક લોકો આને રાષ્ટ્રીય સુરક્ષા માટે જરૂરી ગણાવે છે, જ્યારે વિરોધ પક્ષે તેને ઇમિગ્રેશન વિરોધી રાજનીતિનો ભાગ ગણાવ્યો છે.