કેનેડામાં હિન્દુ મંદિર પર હુમલો, ખાલિસ્તાન સમર્થકો દ્વારા ત્રીજી વખત નિશાન બનાવવામાં આવ્યું

કેનેડામાં ફરી એકવાર હિન્દુ મંદિર પર હુમલાના સમાચાર સામે આવી રહ્યા છે. કેનેડિયન પત્રકારે સોશિયલ મીડિયા પર એક પોસ્ટ શેર કરીને આ માહિતી આપી છે. આ હુમલા પાછળ ખાલિસ્તાની સમર્થકોનો હાથ છે. કેનેડામાં આ ત્રીજી વખત હિન્દુ મંદિરને નિશાન બનાવવામાં આવ્યું છે.

કેનેડામાં હિન્દુફોબિયા ઝડપથી ફેલાઈ રહ્યો છે. કેનેડિયન હિન્દુ ચેમ્બર ઓફ કોમર્સ (CHCC) એ પણ આ અંગે ચિંતા વ્યક્ત કરી છે. CHCC એ હિન્દુ મંદિર પર થયેલા હુમલાનો વીડિયો શેર કર્યો છે અને તેની સખત નિંદા કરી છે.

CHCC એ ચેતવણી આપી

આ હુમલો બ્રિટિશ કોલંબિયાના લક્ષ્મી નારાયણ મંદિર પર થયો હતો. CHCCનું કહેવું છે કે આ હુમલા પાછળ ખાલિસ્તાની આતંકવાદીઓનો હાથ છે. તેઓએ મંદિરમાં ઘૂસીને તોડફોડ કરી. CHCC એ આ હુમલાની નિંદા કરતા કહ્યું કે કેનેડામાં આવી નફરત માટે કોઈ સ્થાન નથી. આ હિન્દુફોબિયાનું ઉદાહરણ છે. અમે આની સામે કડક કાર્યવાહીની માંગ કરીએ છીએ. અમે કેનેડાના તમામ નાગરિકોને હિંસા સામે એક થવા અપીલ કરીએ છીએ.

પત્રકારે વીડિયો શેર કર્યો

કેનેડિયન પત્રકાર ડેનિયલ બોર્ડમેને પણ હુમલાનો વીડિયો શેર કર્યો અને લખ્યું કે આ વીડિયો મંદિરની બહારનો છે. બે અજાણ્યા શખ્સોએ મંદિરની દિવાલોને નુકસાન પહોંચાડ્યું અને સુરક્ષા કેમેરા ચોરી ગયા. આ ઘટના રાત્રે લગભગ 3 વાગ્યાની આસપાસ બની હતી.