જાપાનમાં ભયાનક માર્ગ અકસ્માત: 50થી વધુ વાહનો અથડાયા, એક મહિલાનું મોત

જાપાનમાં નવા વર્ષની રજાઓ માણવા નીકળેલા લોકો માટે શુક્રવારની રાત કાળમુખી સાબિત થઈ હતી.

ગુનમા પ્રાંતના મિનાકામી શહેર નજીક આવેલા એક્સપ્રેસ-વે પર ભારે બરફવર્ષાના કારણે સર્જાયેલા ભયાનક અકસ્માતે સમગ્ર વિસ્તારમાં હડકંપ મચાવી દીધો હતો. બરફની ચાદરથી ઢંકાયેલા રસ્તા પર એક પછી એક વાહનો લપસી ગયા અને જોતજોતામાં 50થી વધુ ગાડીઓ એકબીજા સાથે ટકરાઈ ગઈ. અકસ્માત એટલો ગંભીર હતો કે અનેક વાહનોમાં આગ ફાટી નીકળી, જેના કારણે બચાવ કામગીરી વધુ મુશ્કેલ બની ગઈ. આ દુર્ઘટનામાં એક વૃદ્ધ મહિલાનું મોત થયું છે, જ્યારે અનેક લોકો ઘાયલ થયા છે.

પોલીસના જણાવ્યા અનુસાર, અકસ્માતની શરૂઆત બે ભારે ટ્રકો વચ્ચે થયેલી ટક્કરથી થઈ હતી. બરફના કારણે રસ્તાની સપાટી અત્યંત લપસણી બની ગઈ હતી, જેના કારણે વાહનો પર નિયંત્રણ રાખવું મુશ્કેલ બન્યું. ટ્રકોની ટક્કર બાદ માર્ગ પર ટ્રાફિક જામ સર્જાયો હતો, પરંતુ પાછળથી પૂરઝડપે આવી રહેલા વાહનો સમયસર બ્રેક મારી શક્યા નહીં. પરિણામે એક પછી એક ગાડીઓ અથડાતી ગઈ અને થોડા જ સમયમાં આ ઘટના વિશાળ અકસ્માતમાં ફેરવાઈ ગઈ. બરફીલા રસ્તા અને ઓછી દૃશ્યતા પણ આ દુર્ઘટનાના મુખ્ય કારણો ગણાઈ રહ્યા છે.

અકસ્માત બાદ પરિસ્થિતિ ત્યારે વધુ વિકટ બની ગઈ, જ્યારે અનેક વાહનોમાં આગ લાગી. આગ એટલી ઝડપથી ફેલાઈ કે તેણે એક ડઝનથી વધુ ગાડીઓને પોતાની ઝપટમાં લઈ લીધી. ફાયર બ્રિગેડની ટીમોએ તાત્કાલિક ઘટના સ્થળે પહોંચી આગ બુઝાવવાનો પ્રયાસ શરૂ કર્યો, પરંતુ ભારે ઠંડી અને બરફના કારણે કામગીરીમાં ભારે મુશ્કેલી પડી. આખરે લગભગ સાત કલાકની કઠિન મહેનત બાદ આગ પર કાબૂ મેળવવામાં આવ્યો. આ દરમિયાન અનેક વાહનો સંપૂર્ણ રીતે બળી રાખ થઈ ગયા હતા, જેના દૃશ્યો અત્યંત હૃદયવિદારીક હતા.

આ દુર્ઘટનામાં ટોક્યોની 77 વર્ષીય એક મહિલાનું ઘટના સ્થળે જ મોત નીપજ્યું છે. આ ઉપરાંત 26 લોકો ઘાયલ થયા છે, જેમાંથી પાંચની હાલત અત્યંત ગંભીર હોવાનું હોસ્પિટલના સૂત્રોએ જણાવ્યું છે. તમામ ઇજાગ્રસ્તોને તાત્કાલિક નજીકની હોસ્પિટલોમાં ખસેડવામાં આવ્યા છે, જ્યાં તેમની સારવાર ચાલી રહી છે. જાપાનની સત્તાવાળાઓએ લોકોને બરફીલા હવામાન દરમિયાન અનાવશ્યક મુસાફરી ટાળવાની અપીલ કરી છે અને વાહનચાલકોને વિશેષ સાવચેતી રાખવા સૂચના આપી છે. આ ઘટના ફરી એકવાર સાબિત કરે છે કે કુદરતી પરિસ્થિતિઓ સામે થોડી બેદરકારી પણ કેટલી મોટી દુર્ઘટનાનું કારણ બની શકે છે.