આતંક અને ભીડના ભયથી પશ્ચિમી દેશોમાં નવા વર્ષની ઉજવણી પર રદ, અમેરિકા-યુરોપ પણ એલર્ટ

પેરિસમાં વિશ્વવિખ્યાત ચેમ્પ્સ-એલિસીસ પરનો લાઈવ કોન્સર્ટ રદ, હવે રેકોર્ડેડ કોન્સર્ટ દર્શાવાશે

ડિસેમ્બરના અંતમાં સામાન્ય રીતે પશ્ચિમી દેશોમાં નવા વર્ષની ભવ્ય અને રંગબેરંગી ઉજવણી જોવા મળે છે, જ્યાં રસ્તાઓ પર સંગીત, આતશબાજી અને ઉત્સાહથી ભરેલો માહોલ સર્જાય છે. પરંતુ આ વર્ષે સ્થિતિ થોડી જુદી જોવા મળી રહી છે. 

અમેરિકા, યુરોપ, ઓસ્ટ્રેલિયા અને એશિયાના કેટલાક વિકસિત દેશોમાં નવા વર્ષની ઉજવણીના અનેક મોટા કાર્યક્રમો રદ કરી દેવામાં આવ્યા છે અથવા તો સુરક્ષા વ્યવસ્થામાં અભૂતપૂર્વ વધારો કરવામાં આવ્યો છે. સરકારો અને સ્થાનિક પ્રશાસનો આતંકી હુમલાનો સંભવિત ખતરો, હિંસક ઘટનાઓ અને લાખોની ભીડ એકત્ર થવાથી સર્જાઈ શકે તેવા અકસ્માતોના જોખમને ધ્યાનમાં રાખીને સાવચેતી દાખવી રહી છે. જો કે, મોટાભાગના દેશોએ સત્તાવાર રીતે “આતંકી ભય”ને કારણ તરીકે જાહેર કરવાનું ટાળ્યું છે.

પશ્ચિમી મીડિયા રિપોર્ટ્સ મુજબ, અમેરિકા, યુરોપ અને ઓસ્ટ્રેલિયામાં સુરક્ષાને ધ્યાનમાં રાખીને ઘણા જાહેર કાર્યક્રમો રદ કરવાનો નિર્ણય લેવાયો છે. અમેરિકાના લોસ એન્જેલસમાં આ મહિનાની શરૂઆતમાં ફેડરલ એજન્સીઓએ નવા વર્ષની પૂર્વ સંધ્યાએ થનારા સંભવિત બોમ્બ વિસ્ફોટના કાવતરાને નિષ્ફળ બનાવ્યું હતું. અધિકારીઓએ જણાવ્યું હતું કે મોજાવેના રણમાં ચાર શકમંદ આતંકીઓ હુમલાનો પૂર્વાભ્યાસ કરી રહ્યા હતા, જેમની ધરપકડ કરવામાં આવી હતી. આ ખુલાસા બાદ સરકાર અને સુરક્ષા એજન્સીઓ વધુ સચેત બની ગઈ છે. એફબીઆઈ અનુસાર, આ શકમંદો અનેક સ્થળોએ તાત્કાલિક વિસ્ફોટક ઉપકરણોથી સંકલિત હુમલાની યોજના બનાવી રહ્યા હતા, પરંતુ સમયસર કાર્યવાહી થવાથી મોટી દુર્ઘટના ટળી હતી.

લોસ એન્જેલસમાં નવા વર્ષની ઉજવણી સંપૂર્ણપણે રદ કરવામાં આવી નથી, પરંતુ સુરક્ષા વ્યવસ્થા અત્યંત કડક બનાવી દેવામાં આવી છે અને સતત તેની સમીક્ષા કરવામાં આવી રહી છે. શહેરભરમાં વધારાના પોલીસ દળ, સર્વેલન્સ અને ઇમરજન્સી વ્યવસ્થાઓ તૈનાત કરવામાં આવી છે. જોકે, અમેરિકાના અન્ય કેટલાક શહેરોમાં ભીડભાડ ટાળવા માટે નવા વર્ષની ઉજવણીના કાર્યક્રમો રદ કરવાનો નિર્ણય લેવાયો છે, જે બતાવે છે કે પ્રશાસન જોખમ લેવાના મૂડમાં નથી.

યુરોપમાં પણ પરિસ્થિતિ લગભગ આવી જ છે. ફ્રાન્સની રાજધાની પેરિસમાં ચેમ્પ્સ-એલિસીસ પર યોજાતી ભવ્ય સંગીત કન્સર્ટ રદ કરી દેવામાં આવી છે. સામાન્ય રીતે નવા વર્ષની પૂર્વ સંધ્યાએ લાખો લોકો અહીં ભેગા થાય છે, પરંતુ ભીડના અનિશ્ચિત આવાગમન, નાસભાગ અને ધક્કામુક્કીના જોખમને ધ્યાનમાં રાખીને આ નિર્ણય લેવાયો છે. જોકે, આર્ક ડી ટ્રાયમ્ફ પર આતશબાજીનો કાર્યક્રમ ચાલુ રહેશે, પરંતુ લાઈવ સંગીતના બદલે પહેલાથી રેકોર્ડ કરાયેલ સંગીતનું પ્રસારણ કરાશે. પેરિસમાં છેલ્લા કેટલાક વર્ષોથી થયેલા તોફાનો અને ગેરકાયદે વસાહતીઓ સંબંધિત અશાંતિને કારણે પણ સરકાર મોટી ભીડ એકત્ર થતી જગ્યાઓ ટાળવા માંગે છે.

ઓસ્ટ્રેલિયામાં સિડનીના બોન્ડી બીચ પર નવા વર્ષની પૂર્વ સંધ્યાનો કાર્યક્રમ રદ કરવામાં આવ્યો છે. આ નિર્ણય આ મહિનાની શરૂઆતમાં યહૂદી સમુદાયને નિશાન બનાવીને થયેલા જીવલેણ આતંકી હુમલા બાદ લેવામાં આવ્યો છે. વેવરલી કાઉન્સિલે જણાવ્યું કે લોકોની સુરક્ષા અને જમીની પરિસ્થિતિને ધ્યાનમાં રાખીને આ નિર્ણય જરૂરી હતો. આયોજકોએ આ પગલાને યહૂદી સમુદાય સાથે એકતા દર્શાવવાના પ્રયાસ તરીકે પણ રજૂ કર્યું છે. જોકે, ઓસ્ટ્રેલિયાના અન્ય શહેરોમાં નવા વર્ષની ઉજવણી ચાલુ રહેશે, પરંતુ સુરક્ષા વ્યવસ્થા કડક રાખવામાં આવી છે.

એશિયામાં જાપાનની રાજધાની ટોક્યોમાં પણ ભીડના જોખમને ધ્યાનમાં રાખીને શિબુયા વિસ્તારમાં 31 ડિસેમ્બરે યોજાતી નવા વર્ષની ઉજવણી રદ કરવામાં આવી છે. શિબુયા વોર્ડના મેયર કેન હાસેબેએ જણાવ્યું કે આતંકી હુમલાની કોઈ ચોક્કસ ચેતવણી નથી, પરંતુ ભૂતકાળમાં ભીડને કારણે થયેલી દુર્ઘટનાઓને ધ્યાનમાં રાખીને તકેદારીના ભાગરૂપે આ નિર્ણય લેવાયો છે. આ તમામ ઘટનાઓથી સ્પષ્ટ થાય છે કે આ વર્ષે પશ્ચિમી અને વિકસિત દેશોમાં નવા વર્ષની ઉજવણી ઉત્સાહથી વધારે સાવચેતી અને સુરક્ષાના માહોલમાં પ્રવેશ કરી રહી છે.