ખાડી દેશોની કડક કાર્યવાહીથી પાકિસ્તાનની વૈશ્વિક પ્રતિષ્ઠાને મોટો આંચકો

પાકિસ્તાનમાં ભીખ માંગવાનો ધંધો હવે ગરીબીનું પ્રતીક નહીં, પરંતુ એક સંગઠિત ઉદ્યોગ તરીકે સામે આવી રહ્યો છે.

પાકિસ્તાનના સંરક્ષણ મંત્રીના જણાવ્યા અનુસાર, દેશના ભિખારીઓ એક વર્ષમાં અંદાજે 42 અબજ રૂપિયા કમાઈ લે છે. આ ભિખારીઓ માત્ર દેશની અંદર જ નહીં, પરંતુ રોજગાર કે ધાર્મિક યાત્રાના બહાને વિદેશ જઈને ભીખ માંગે છે, જેના કારણે પાકિસ્તાનની આંતરરાષ્ટ્રીય છબી ગંભીર રીતે નુકસાન પામી છે.

ખાડી દેશો ખાસ કરીને સાઉદી અરેબિયા અને સંયુક્ત અરબ અમીરાત (UAE) હવે પાકિસ્તાની નાગરિકો પર કડક નજર રાખી રહ્યા છે. સાઉદી અરેબિયાએ ભીખ માંગવાના આરોપમાં લગભગ 56 હજાર પાકિસ્તાની નાગરિકોને પોતાના દેશમાંથી બહાર કાઢી દીધા છે. બીજી તરફ UAEએ વિઝા નિયમોને વધુ કડક બનાવ્યા છે અને ગત મહિને અનેક પાકિસ્તાનીઓને વિઝા આપવાનું બંધ કરી દીધું હતું, કારણ કે આશંકા હતી કે કેટલાક લોકો ત્યાં જઈને ભીખ માંગવા અને ગુનાહિત પ્રવૃત્તિઓમાં સંડોવાઈ રહ્યા છે.

આ પરિસ્થિતિને ધ્યાનમાં રાખીને પાકિસ્તાન સરકારે પણ કડક પગલાં લેવા શરૂ કર્યા છે. આ વર્ષે 50 હજારથી વધુ પાકિસ્તાની નાગરિકોને વિદેશ યાત્રા કરતા અટકાવવામાં આવ્યા છે, જેથી માનવ તસ્કરી અને સંભાવિત ભિખારીઓને રોકી શકાય. આ માહિતી આગા રફીઉલ્લાહની અધ્યક્ષતામાં નેશનલ એસેમ્બલીની ઓવરસીઝ પાકિસ્તાની અને માનવાધિકાર બાબતોની સ્થાયી સમિતિની બેઠક દરમિયાન રજૂ કરવામાં આવી હતી.

ફેડરલ ઇન્વેસ્ટિગેશન એજન્સી (FIA)ના ડાયરેક્ટર જનરલ રીફત મુખ્તાર રઝાએ સંસદીય સમિતિને જણાવ્યું કે, આ વર્ષે અલગ અલગ એરપોર્ટ પરથી ઓછામાં ઓછા 51 હજાર પાકિસ્તાનીઓને વિદેશ જતાં અટકાવવામાં આવ્યા. આ લોકો યુરોપ અને સાઉદી અરેબિયા જવાનો પ્રયાસ કરી રહ્યા હતા. સાઉદી જવા ઇચ્છનારાઓ ઉમરાહના બહાને મુસાફરી કરી રહ્યા હતા, જ્યારે યુરોપ જવા માંગનારાઓ પાસે જરૂરી દસ્તાવેજો જ ન હતા.

UAEએ પણ આ જ કારણસર લગભગ 6 હજાર પાકિસ્તાનીઓને ડિપોર્ટ કર્યા છે, જ્યારે અઝરબૈઝાને અંદાજે 2500 ભિખારીઓને પોતાના દેશમાંથી કાઢી મૂક્યા છે. સમિતિ સમક્ષ તે બાબત પણ સામે આવી કે અનેક પાકિસ્તાની વિદેશ ગયા બાદ ક્યારેય પરત ફર્યા જ નથી. રઝાએ જણાવ્યું કે, આ વર્ષે 24 હજાર પાકિસ્તાની કંબોડિયા ગયા હતા, જેમાંથી 12 હજાર હજી સુધી પરત આવ્યા નથી. આ ઉપરાંત, 4 હજાર લોકો ટૂરિસ્ટ વિઝા પર મ્યાનમાર ગયા હતા, જેમાંથી લગભગ 2500 પરત ફર્યા નથી.

આ તમામ આંકડાઓ સ્પષ્ટ કરે છે કે ભીખ માંગવાનો ધંધો હવે પાકિસ્તાન માટે માત્ર સામાજિક સમસ્યા નહીં, પરંતુ આંતરરાષ્ટ્રીય સ્તરે અપમાન અને રાજદ્વારી મુશ્કેલીઓનું કારણ બની ગયો છે.