યુદ્ધ વચ્ચે રશિયા અને યુક્રેને મોટું કામ કર્યું, ઝેલેન્સકીએ રશિયા સાથે કેદીઓની આપ-લેની જાહેરાત કરી

રશિયા અને યુક્રેન વચ્ચે યુદ્ધ ચાલુ છે. બંને દેશો સતત એકબીજા પર હુમલો કરી રહ્યા છે. તાજેતરમાં, યુક્રેને રશિયાના કાળા સમુદ્રના રિસોર્ટ સોચી નજીક તેલ ડેપો પર ડ્રોન હુમલો કર્યો. આ હુમલા પછી, યુક્રેનના રાષ્ટ્રપતિ વોલોડીમીર ઝેલેન્સકીએ હવે એક મોટી જાહેરાત કરી છે. ઝેલેન્સકીએ રશિયા સાથે કેદીઓની આપ-લેની જાહેરાત કરી છે.

યુક્રેનના રાષ્ટ્રપતિ ઝેલેન્સકીએ કહ્યું કે જુલાઈમાં ઇસ્તંબુલમાં વાતચીત પછી, યુક્રેન અને રશિયા 1,200 કેદીઓની આપ-લે કરવા સંમત થયા હતા. તેમણે સોશિયલ મીડિયા પ્લેટફોર્મ 'X' પર એક પોસ્ટમાં કહ્યું, "1,200 કેદીઓની આપ-લે માટે એક કરાર થયો છે." ઝેલેન્સકીએ કહ્યું કે આપ-લે કરવા માટે વ્યક્તિઓની યાદી તૈયાર કરવામાં આવી રહી છે જેથી "આપણા સામાન્ય નાગરિકો પાછા આવી શકે".

રશિયન અધિકારીઓએ જણાવ્યું કે સોચી નજીક તેલ ડેપો પર યુક્રેનના ડ્રોન હુમલાથી ભારે આગ લાગી. ક્રાસ્નોદર પ્રદેશના ગવર્નર વેનિઆમિન કોન્ડ્રેટેવે 'X પર જણાવ્યું હતું કે ડ્રોનનો કાટમાળ પડ્યો હતો અને તેના કારણે ઇંધણ ટાંકીમાં ભારે આગ લાગી હતી, જેને બુઝાવવા માટે 120 થી વધુ અગ્નિશામકોને તૈનાત કરવામાં આવ્યા હતા. સોશિયલ મીડિયા પર સામે આવેલા આ ઘટનાના વીડિયોમાં તેલ ડેપો ઉપર ધુમાડાના મોટા વાદળો ઉડતા જોવા મળ્યા હતા. રશિયાના નાગરિક ઉડ્ડયન સત્તાવાળા રોસાવિઆત્સિયાએ સોચી એરપોર્ટ પર ફ્લાઇટ કામગીરી અસ્થાયી રૂપે બંધ કરી દીધી છે.