રશિયાએ દક્ષિણ યૂક્રેનિયન શહેર ઝાપોરિઝ્ઝિયામાં કર્યો ઘાતક હુમલો, 13 નાગરિકોના મોત

રશિયા અને યૂક્રેન વચ્ચે યુદ્ધ ચાલુ છે. દરમિયાન, રશિયાએ બુધવારે દક્ષિણ યૂક્રેનિયન શહેર ઝાપોરિઝ્ઝિયામાં ઘાતક હુમલો કર્યો. રશિયા દ્વારા કરવામાં આવેલા મિસાઇલ હુમલામાં ઓછામાં ઓછા 13 નાગરિકો માર્યા ગયા અને ડઝનબંધ ઘાયલ થયા. યૂક્રેનના રાષ્ટ્રપતિ વોલોડીમીર ઝેલેન્સકીએ જણાવ્યું કે હુમલા સમયે લોકો કાટમાળ નીચે ફસાયેલા હતા અને તેમને બચાવવા માટે ઇમર્જન્સી સર્વિસ ઘટનાસ્થળે પહોંચી હતી. ઝેલેન્સકીએ તેમની ટેલિગ્રામ ચેનલ પર એક ફોટો પોસ્ટ કર્યો જેમાં શહેરના રસ્તાઓ કાટમાળથી ભરેલા છે, જેની નીચે નાગરિકો દબાયેલા પડેલા જોવા મળે છે. ઇજાગ્રસ્તોને ઇમરજન્સી સેવાઓના કર્મચારીઓ દ્વારા સારવાર આપવામાં આવી રહી હતી.

રાષ્ટ્રપતિ ઝેલેન્સકીએ કહ્યું કે આ હુમલો યુદ્ધ દરમિયાન નાગરિક વિસ્તારો પર હવાઈ હુમલાનું બીજું ઉદાહરણ છે. ઝેલેન્સકી અને પ્રાદેશિક ગવર્નર ઇવાન ફેડોરોવે જણાવ્યું કે બુધવારના હુમલામાં ઓછામાં ઓછા 13 નાગરિકો માર્યા ગયા હતા. હુમલાની થોડી મિનિટો પહેલા, ફેડોરોવે ઝાપોરિઝ્ઝિયા પ્રદેશ પર વિનાશક ગ્લાઇડ બોમ્બ અને મિસાઇલ હુમલાઓની ચેતવણી આપી હતી. ફેડોરોવે જણાવ્યું કે રશિયન સૈનિકોએ બપોરે ઝાપોરિઝ્ઝિયા પર ગ્લાઇડ બોમ્બ ફેંકવાનું શરૂ કર્યું અને ઓછામાં ઓછા બે બોમ્બ શહેરમાં રહેણાંક ઇમારતો પર પડ્યા. તેમણે જાહેરાત કરી કે ગુરુવાર આ પ્રદેશમાં શોકનો દિવસ રહેશે.