બ્રાઉન યુનિવર્સિટીમાં ફાઇનલ પરીક્ષા દરમિયાન ગોળીબાર, બેના મોત, આઠ ઘાયલ

અમેરિકાના રોડ આઇલેન્ડ રાજ્યની પ્રતિષ્ઠિત બ્રાઉન યુનિવર્સિટીમાં શનિવારે બપોરે એક હચમચાવી નાખતી ઘટના બની છે.

ફાઇનલ પરીક્ષાઓ ચાલી રહી હતી તે દરમિયાન એક અજાણ્યો શખ્સ અચાનક કેમ્પસની એન્જિનિયરિંગ બિલ્ડિંગમાં ઘૂસી ગયો અને અંધાધૂંધ ગોળીબાર શરૂ કરી દીધો. આ જીવલેણ હુમલામાં બે લોકોના મોત થયા છે, જ્યારે ઓછામાં ઓછા આઠ લોકો ગંભીર રીતે ઘાયલ થયા છે. હુમલાખોર કાળા કપડાં પહેરેલો હોવાનું જણાવાયું છે અને તે ઘટનાસ્થળ પરથી ફરાર થઈ ગયો હોવાથી સમગ્ર કેમ્પસ તથા આસપાસના વિસ્તારોમાં ભય અને તણાવનો માહોલ છવાઈ ગયો છે.

આ ગોળીબાર યુનિવર્સિટીની સ્કૂલ ઓફ એન્જિનિયરિંગ અને ફિઝિક્સ ડિપાર્ટમેન્ટનો ભાગ ગણાતી બારુસ એન્ડ હોલી બિલ્ડિંગમાં થયો હતો, જ્યાં એન્જિનિયરિંગ ડિઝાઇનની ફાઇનલ પરીક્ષાઓ ચાલી રહી હતી. ગોળીબારના અવાજ સાથે જ કેમ્પસમાં અફરાતફરી મચી ગઈ હતી. યુનિવર્સિટી પ્રશાસને તાત્કાલિક એક્ટિવ શૂટર એલર્ટ જાહેર કરીને વિદ્યાર્થીઓ અને સ્ટાફને દરવાજા બંધ કરવા, ફોન સાઇલન્ટ રાખવા અને સુરક્ષિત જગ્યાએ છુપાઈ જવાની સૂચના આપી હતી. થોડા જ સમયમાં કેમ્પસ સંપૂર્ણ રીતે લોકડાઉન જેવી સ્થિતિમાં ફેરવાઈ ગયો હતો.

પ્રોવિડન્સ શહેરના ડેપ્યુટી ચીફ ઓફ પોલીસ ટિમોથી ઓ’હારાએ જણાવ્યું હતું કે હુમલાખોર કાળા કપડાં પહેરેલો પુરુષ હતો અને ગોળીબાર બાદ તે ઇમારતમાંથી હોપ સ્ટ્રીટ તરફ ભાગી ગયો હતો. ઘટનાને ત્રણથી ચાર કલાક વીતી ગયા બાદ પણ પોલીસ ટીમો કેમ્પસની ઇમારતોની એક પછી એક તલાશી લઈ રહી હતી અને આસપાસના વિસ્તારોમાં સઘન તપાસ ચાલી રહી હતી. શંકાસ્પદ વ્યક્તિને પકડવા માટે સ્થાનિક પોલીસ સાથે રાજ્ય અને ફેડરલ એજન્સીઓ પણ જોડાઈ ગઈ છે.

પ્રોવિડન્સના મેયર બ્રેટ સ્માઇલીએ પત્રકાર પરિષદમાં જણાવ્યું હતું કે ઘાયલ થયેલા તમામ લોકોને રોડ આઇલેન્ડ હોસ્પિટલમાં દાખલ કરવામાં આવ્યા છે. તેમની હાલત ગંભીર હોવા છતાં સ્થિર હોવાનું જણાવાયું છે. મેયરે સ્પષ્ટ કર્યું હતું કે હુમલાખોરને ઝડપવા માટે તમામ સંસાધનો કામે લગાવવામાં આવ્યા છે. સુરક્ષા કારણોસર કેમ્પસ અને આસપાસના વિસ્તારોમાં ‘શેલ્ટર-ઇન-પ્લેસ’નો આદેશ જારી કરવામાં આવ્યો છે અને લોકોને ઘરમાં જ રહેવા અપીલ કરવામાં આવી છે. આ તપાસમાં ફેડરલ બ્યુરો ઓફ ઇન્વેસ્ટિગેશન (FBI) પણ સ્થાનિક પોલીસને મદદ કરી રહી છે.

ઘટનાના સમયે કેમ્પસમાં હાજર વિદ્યાર્થીઓએ જણાવ્યું હતું કે સાયરનના અવાજ અને એક્ટિવ શૂટર એલર્ટ મળતા જ તેઓ ગભરાઈ ગયા હતા. ઘણા વિદ્યાર્થીઓ નજીકની લેબોમાં ડેસ્ક નીચે છુપાઈ ગયા, લાઇટ બંધ કરી દીધી અને શાંતિથી રાહ જોતા રહ્યા. પરીક્ષા દરમિયાન આવી ઘટના બનવી અત્યંત ભયાનક હોવાનું યુનિવર્સિટીના પ્રોવોસ્ટ ફ્રાન્સિસ ડોયલે જણાવ્યું હતું અને કહ્યું હતું કે વિદ્યાર્થીઓ તથા સ્ટાફની સલામતી યુનિવર્સિટીની સર્વોચ્ચ પ્રાથમિકતા છે.

આ ઘટનાએ રાષ્ટ્રીય સ્તરે પણ પ્રતિક્રિયા જન્માવી છે. અમેરિકી રાષ્ટ્રપતિ ડોનાલ્ડ ટ્રમ્પને ઘટનાની જાણ કરવામાં આવી હતી અને વ્હાઇટ હાઉસમાં તેમણે કહ્યું હતું કે “આ ક્ષણે આપણે માત્ર પીડિતો અને તેમના પરિવારો માટે પ્રાર્થના કરી શકીએ છીએ.” ઉપરાષ્ટ્રપતિ જેડી વાન્સે પણ સોશિયલ મીડિયા પ્લેટફોર્મ X પર પોસ્ટ કરીને જણાવ્યું હતું કે તેઓ સ્થિતિ પર સતત નજર રાખી રહ્યા છે અને FBI સંપૂર્ણ મદદ માટે તૈયાર છે. બ્રાઉન યુનિવર્સિટીમાં બનેલી આ ઘટના ફરી એકવાર અમેરિકામાં કેમ્પસ સુરક્ષા અને ગન વાયોલન્સ અંગે ગંભીર પ્રશ્નો ઊભા કરી રહી છે.