યુરોપમાં વાવાઝોડું ‘ક્લાઉડિયા’: પ્રચંડ વરસાદ, પૂરની વિનાશકારી પરિસ્થિતિ

યુરોપ હાલમાં ‘ક્લાઉડિયા’ નામના તીવ્ર અને વિનાશક વાવાઝોડાના પ્રહારો ઝલી રહ્યું છે. પોર્ટુગલથી લઈને બ્રિટન અને વેલ્સ સુધી વાવાઝોડાની અસર એટલી ભયાનક રહી છે કે ભારે વરસાદ, ભભૂકા મારતા પવન અને વારંવાર થતા ભૂસ્ખલનોએ અનેક વિસ્તારોમાં જીવતરની ગતિ રોકી નાખી છે.

વાવાઝોડું ઉત્તર દિશામાં આગળ વધતાં બ્રિટન અને વેલ્સમાં બે લોકોના મોત થવાની પુષ્ટિ થઈ છે, જ્યારે ઘણા લોકો ઘાયલ થયા છે.

અનેક શહેરો અને ગામોમાં પૂરનું પાણી રસ્તાઓ પર છવાઈ ગયું હોવાથી લોકો પોતાના ઘરોમાંથી બહાર પણ નીકળી શકે તેવી સ્થિતિ નથી રહી અને સ્થાનિક એજન્સીઓ સતત લોકોને સલામત સ્થળે સ્થળાંતરિત કરવાનો પ્રયાસ કરી રહી છે.

વાવાઝોડાની સૌથી વિકરાળ અસર પોર્ટુગલમાં જોવા મળી છે, જ્યાં સેતુબલ અને ફારો જિલ્લાના મોટાભાગના વિસ્તારોમાં 'ઓરેન્જ એલર્ટ' જાહેર કરવામાં આવ્યું હતું. પોર્ટુગલના નેશનલ ઈમર્જન્સી અને સિવિલ પ્રોટેક્શન પ્રાધિકરણ મુજબ, બુધવાર બપોરથી શુક્રવાર સવાર સુધીમાં આશરે 2,434 ઇમરજન્સી કિસ્સાઓ નોંધાયા હતા—જેનામાંથી મોટાભાગના પૂર અને ઝાડ પડી જવાથી થતા અકસ્માતો હતા. દક્ષિણ પોર્ટુગલનો ફારો જિલ્લો તો શુક્રવારે પૂરેપૂરું પાણીમાં ગરકાવ થઈ ગયો હતો. ભારે વરસાદ અને તોફાની પવનને કારણે અનેક વૃક્ષો ધરાશાયી થયા હતા, જ્યારે સેતુબલના અઝીતાઓ વિસ્તારમાં ભૂસ્ખલનથી માર્ગનો એક મહત્વપૂર્ણ ભાગ સરી પડતા વાહનવ્યવહાર સંપૂર્ણ રીતે ઠપ્પ થઈ ગયો હતો. દરિયાકાંઠાના વિસ્તારોમાં સમુદ્ર 4 થી 5 મીટર ઊંચા મોજા ઉછાળી રહ્યો છે, જે સ્થાનિક લોકોમાં વધતી ચિંતાનો કારણ બની રહ્યો છે.

બ્રિટન અને વેલ્સમાં પણ વાવાઝોડું ‘ક્લાઉડિયા’ સતત પ્રકોપ વધારી રહ્યું છે. બ્રિટનના હવામાન વિભાગ મુજબ, ગ્વેન્ટના તફાલોગ વિસ્તારમાં 24 કલાકની અંદર 81.8 મિમી જેટલો વરસાદ નોંધાયો છે, જેના કારણે વેલ્સના અનેક વિસ્તારો પૂરની ગંભીર સ્થિતીમાં ધકેલાઈ ગયા છે. અહીં એક હૃદયકંપી ઘટનામાં, ગુરુવારે એક વૃદ્ધ દંપતીને તેમના પાણીમાં ગરકાવ થયેલા ઘરમાંથી મૃત હાલતમાં બહાર કાઢવામાં આવ્યા હતા. આશંકા છે કે રાત્રે સૂઈ રહ્યાં ત્યારે પાણીનું સ્તર અચાનક વધી જતાં તેઓ બચી શક્યા નહીં. હાલ પણ વેલ્સ અને બ્રિટનની અનેક નદીઓમાં પાણીનું સ્તર સતત વધી રહ્યું છે, જેથી નવો પૂર આવી શકે એવી ચેતવણીઓ યથાવત છે.

યુરોપના ભાગોમાં આ વાવાઝોડાએ જે વિનાશ સર્જ્યો છે તેમાંથી સ્પષ્ટ થાય છે કે ‘ક્લાઉડિયા’ની અસર હજુ થોડા દિવસો સુધી જનજીવનને અસર કરતી રહેશે. ભારે પવન, પૂરની અસર અને સમુદ્રમાં ઉછળતાં મોજાંને કારણે હવે પણ અનેક વિસ્તારો હાઈ એલર્ટ પર છે, અને સ્થાનિક એજન્સીઓ સતત બચાવ અને રાહત કામગીરીમાં તત્પર છે.