ઉસ્માન હાદીની હત્યા મુદ્દે બાંગ્લાદેશમાં તણાવ, યુનુસ સરકારને 24 દિવસનું અલ્ટીમેટમ

બાંગ્લાદેશમાં ઇન્કલાબ મંચના પ્રવક્તા ઉસ્માન હાદીની હત્યાના કેસને લઈને દેશનું રાજકીય વાતાવરણ વધુ તંગ બનતું જઈ રહ્યું છે.

આ મામલે મોહમ્મદ યુનુસની વચગાળાની સરકાર ગંભીર દબાણ હેઠળ આવી ગઈ છે. ઇન્કલાબ મંચે સરકારને ખુલ્લું અલ્ટીમેટમ આપતાં આગામી 24 દિવસની અંદર આ હત્યાના કેસનો ટ્રાયલ પૂર્ણ કરવાની માગ કરી છે. મંચનું કહેવું છે કે જો સરકાર સમયમર્યાદામાં ન્યાય અપાવવામાં નિષ્ફળ જશે, તો તે વધુ ઉગ્ર આંદોલનનો માર્ગ અપનાવશે, જેના પરિણામે દેશમાં કાયદો-વ્યવસ્થા પરિસ્થિતિ વધુ બગડી શકે છે.

રવિવારે ઢાકાના શાહબાગ ખાતે યોજાયેલા કાર્યક્રમમાં ઇન્કલાબ મંચના સચિવ અબ્દુલ્લા અલ જબ્બારે આક્રમક ભાષામાં સરકારને ચેતવણી આપી હતી. તેમણે જણાવ્યું હતું કે ઉસ્માન હાદીની હત્યા માત્ર એક વ્યક્તિની નહીં, પરંતુ એક વિચારધારાની હત્યા છે, અને આ માટે જવાબદાર હત્યારાઓ, માસ્ટરમાઇન્ડ તથા તેમને મદદ કરનાર તમામ લોકો સામે કાયદાકીય કાર્યવાહી તાત્કાલિક અને નિષ્પક્ષ રીતે પૂર્ણ થવી જોઈએ.

સાથે જ મંચે દેશની સાર્વભૌમત્વતા અને આંતરિક સુરક્ષાનો મુદ્દો ઉઠાવતા બાંગ્લાદેશમાં કામ કરી રહેલા ભારતીય નાગરિકોના વર્ક પરમિટ રદ કરવાની વિવાદાસ્પદ માંગ પણ આગળ ધરી છે, જેના કારણે દ્વિપક્ષીય સંબંધોને લઈને નવી ચિંતાઓ ઊભી થઈ છે.

ઇન્કલાબ મંચે માત્ર સ્થાનિક કાર્યવાહી પૂરતી પોતાની માગોને સીમિત રાખી નથી. મંચે સ્પષ્ટ કહ્યું છે કે જો ભારત બાંગ્લાદેશમાં ગુનો કરી શરણ લેનારા દોષિતોને પરત સોંપવાનો ઇન્કાર કરશે, તો તેમની સામે આંતરરાષ્ટ્રીય કોર્ટમાં કેસ દાખલ કરવામાં આવવો જોઈએ. આ નિવેદનથી ભારત-બાંગ્લાદેશ સંબંધોમાં કૂટનીતિક તણાવ વધવાની શક્યતા વ્યક્ત કરવામાં આવી રહી છે. બીજી તરફ, બાંગ્લાદેશ પોલીસ દ્વારા કરવામાં આવેલા કેટલાક દાવાઓને ભારતીય સુરક્ષા એજન્સીઓએ સદંતર ફગાવી દીધા છે.

ઢાકા પોલીસે દાવો કર્યો હતો કે ઉસ્માન હાદીની હત્યાના બે મુખ્ય શંકાસ્પદ આરોપીઓ મેઘાલયની સરહદ મારફતે ભારતમાં પ્રવેશી ગયા છે. જોકે, આ દાવા પર ભારતીય પક્ષે કડક પ્રતિભાવ આપ્યો છે. મેઘાલયમાં BSFના આઇજી ઓ.પી. ઉપાધ્યાયે આ આરોપોને પાયાવિહોણા અને ભ્રામક ગણાવ્યા છે.

તેમણે સ્પષ્ટપણે જણાવ્યું છે કે હલુઆઘાટ સેક્ટરથી કોઈ વ્યક્તિએ ગેરકાયદે સરહદ ઓળંગી હોવાના કોઈ પુરાવા કે વિશ્વસનીય બાતમી નથી. સાથે જ સ્થાનિક પોલીસ પણ આવી કોઈ શંકાસ્પદ પ્રવૃત્તિની પુષ્ટિ કરતી નથી.

આ સમગ્ર ઘટનાક્રમને કારણે બાંગ્લાદેશની વચગાળાની સરકાર માટે પડકારો વધી રહ્યા છે. એક તરફ દેશની અંદરથી ન્યાય અને કડક કાર્યવાહીની માગ ઉઠી રહી છે, તો બીજી તરફ ભારત સાથેના સંબંધોને લઈને પણ સરકારને સંયમભર્યો અભિગમ અપનાવવો પડશે. ઉસ્માન હાદીની હત્યાનો કેસ હવે માત્ર એક ક્રિમિનલ મામલો નહીં રહી, પરંતુ તે બાંગ્લાદેશની રાજનીતિ, આંતરિક સ્થિરતા અને વિદેશ નીતિ સાથે જોડાયેલો સંવેદનશીલ મુદ્દો બની ગયો છે.