ઈજનેરી-ફાર્મસીમાં પ્રવેશ માટેની ગુજકેટ 23મી એપ્રિલે લેવાશે

ગુજરાત શિક્ષણ બોર્ડ દ્વારા ગુજકેટની પરીક્ષા માટે પરિપત્ર કરી દેવામાં આવ્યો છે.જે મુજબ 23મી એપ્રિલે રાજ્યભરમાં ગુજકેટની પરીક્ષા લેવાશે.ઈજનેરી-ફાર્મસીમાં પ્રવેશ માટેની ગુજકેટ એ,બી અને એબી એમ ત્રણેય ગ્રુપના વિદ્યાર્થીઓ આપી શકશે.

રાજ્ય સરકારે ગત વર્ષથી ઈજનેરી અને ફાર્મસી પ્રવેશ માટે ગુજકેટ લાગુ કરી દીધી છે. ત્યારે આ વર્ષે 23મી એપ્રિલ ગુજકેટ લેવાશે. સવારે 10 થી 6 દરમિયાન રાજ્યના વિવિધ જીલ્લા કેન્દ્રો પરથી પરીક્ષા લેવાશે.એ,બી અને એબી ગ્રુપના વિદ્યાર્થીઓ માટે ચાર વિષયમાં પરીક્ષા લેવાશે.

જેમાં ફિઝિક્સ અને કેમેસ્ટ્રીનું સંયુક્ત પેપર હશે જેમાં બંને વિષયનાં 40-40 પ્રશ્નો 40-40 ગુણનાં હશે અને કુલ મળીને 80 પ્રશ્નો સાથેનું 80 ગુણનું પેપર હશે.જ્યારે બાયોલોજી અને મેથ્સનું પેપર અલગ હશે જેમાં પણ 40-40 પ્રશ્નો રહેશે અને જેના ગુણ પણ 40-40 રહેશે.

ગુજરાતી,હિન્દી અને અંગ્રેજી એમ ત્રણ ભાષામાં પરીક્ષા લેવાશે.ધો.12નાં અભ્યાસક્રમ આધારીત ગુજકેટનો અભ્યાસક્રમ રહેશે.તમામ પ્રશ્નો એમસીક્યુ આધારીત હશે ગત વર્ષે સેમેસ્ટર આધારીત છેલ્લી ધો.12ની પરીક્ષા હોય આ વર્ષે ધો.12નાં એક વર્ષના અભ્યાસક્રમ આધારીત એન્યુઅલ પેટર્ન પ્રમાણે લેવાનારી પરીક્ષા બાદની પ્રથમ ગુજકેટ હશે.