કચ્છ : બહેનને બચાવવા ભાઇએ અને બંને સંતાનોને બચાવવા પિતાએ ઝંપલાવ્યું કેનાલમાં, જુઓ શું આવ્યું પરિણામ

એક પિતા પોતાના સંતાનોને કેટલો પ્રેમ કરતાં હોય છે તે દર્શાવતી ઘટના કચ્છના ભચાઉમાં બની છે. લોધેશ્વર નજીક કેનાલમાં તણાઇ રહેલાં પોતાના બે સંતાનોને બચાવવા પિતાએ પણ કેનાલમાં ઝંપલાવી દીધું હતું. હાલ કેનાલમાંથી પિતાનો મૃતદેહ મળી આવ્યો છે જયારે બંને સંતાનો હજી લાપત્તા છે.

કચ્છના ભચાઉ નજીક એક સાથે પિતા અને બે સંતાનો કેનાલમાં તણાય ગયાં હોવાની ઘટનાથી શોકનું મોજુ ફરી વળ્યું છે. એકબીજાનો જીવ બચાવવા માટે ત્રણેય કેનાલના પાણીમાં ગરકાવ થઇ ગયાં હતાં. જેમાં કેનાલમાંથી પિતાનો મૃતદેહ મળી આવ્યો છે જયારે બંને સંતાનોની શોધખોળ ચાલી રહી છે. સમગ્ર ઘટના પર નજર નાંખવામાં આવે તોમંગળવારે સવારે 10 વાગ્યાની આસપાસ આ કરુણ ઘટના બની હતી જેમાં વોંધ ગામથી દરરોજ કરમરીયા ગામના વાડી વિસ્તારમાં મીદિયાવળ વાંઢવા આવતા કોળી પરિવારના ત્રણ સભ્યો નર્મદા કેનાલમાં ડુબી ગયાં છે. બે સંતાનો અને તેમના પિતા મીદીયાવળ તરફ આવી રહયાં હતાં ત્યારે બે સંતાનોને તરસ લાગતાં તેઓ કેનાલના કિનારે ગયાં હતાં. જયાં નાની બહેનનો પગ લપસતાં તે કેનાલમાં તણાવા લાગી હતી. પોતાની બહેનને તણાતા જોઇ ભાઇએ બુમાબુમ કરી પોતે પણ કેનાલમાં કુદકો મારી દીધો હતો. બંનેને તરતા આવડતું નહિ હોવાથી તેઓ તણવા લાગ્યાં હતાં. પોતાની આંખ સામે બંને સંતાનોને તણાતા જોઇ પિતા માનસંગ કોળીએ પણ કેનાલમાં ઝંપલાવી દીધું હતું. બનાવની જાણ થતાં સ્થળ પર લોકો ભેગા થઇ ગયાં હતાં અને ફાયરબ્રિગેડને જાણ કરી હતી. કેનાલના પાણીમાંથી માનસંગ કોળીનો મૃતદેહ મળી આવ્યો છે જયારે બંને સંતાનોની શોધખોળ ચાલી રહી છે.