આંધ્રપ્રદેશના ધવલેશ્વરમ સ્થિત જિલ્લા પરિષદ ગર્લ્સ હાઈસ્કૂલ (ZPGHS)માં ધોરણ-10માં અભ્યાસ કરતી 14 વર્ષની કંદુલા જેસીએ દેશનું ગૌરવ વધાર્યું છે. વિશ્વના પ્રથમ ઓલ-ગર્લ્સ લૂનર ક્યુબસેટ મિશન ‘મિશન શક્તિસેટ (Mission ShakthiSAT)’ માટે ભારતમાંથી પસંદ થયેલી 20 વિદ્યાર્થીનીઓમાં જેસીનું સ્થાન મળ્યું છે.
સુથાર પરિવારમાંથી આવતી જેસીએ 108 દેશોની લગભગ 12 હજાર વિદ્યાર્થીનીઓ વચ્ચે યોજાયેલી પસંદગી પ્રક્રિયા સફળતાપૂર્વક પાર કરી છે. આંધ્રપ્રદેશમાંથી પસંદગી પામનાર તે એકમાત્ર વિદ્યાર્થીની છે.
જેસીની વિજ્ઞાન પ્રત્યેની જિજ્ઞાસા ઓળખીને તેની ફિઝિકલ સાયન્સ શિક્ષિકા અને અટલ ટિંકરિંગ લેબની ઇન્ચાર્જ મણિમાલાએ ગયા વર્ષે તેનું નોંધણી કરાવ્યું હતું. ધોરણ-10ની બોર્ડ પરીક્ષાની તૈયારી વચ્ચે પણ જેસીએ દરરોજ ઓનલાઈન ક્લાસમાં હાજરી આપી અને અત્યાર સુધી કાર્યક્રમના લગભગ 50થી 60 ટકા અભ્યાસક્રમ પૂર્ણ કરી દીધા છે. મિશન શક્તિસેટ હેઠળ સેટેલાઇટ સિસ્ટમ, પ્રોપલ્શન, થર્મોડાયનેમિક્સ અને અવકાશ ટેકનોલોજી સહિતના 21 મોડ્યુલ અને લગભગ 550 સત્રોનો સમાવેશ થાય છે.
પસંદગી પ્રક્રિયામાં ઓનલાઈન અભ્યાસ ઉપરાંત વૈજ્ઞાનિકો સાથે અંગ્રેજીમાં ઇન્ટરવ્યૂ અને STEM શિક્ષણના મહત્વ અંગે એક મિનિટનો વિડિયો રજૂ કરવાનો પણ સમાવેશ હતો. આંતરરાષ્ટ્રીય વૈજ્ઞાનિકો સાથે વાતચીત માટે જેસીએ પોતાના શિક્ષકોની મદદથી અંગ્રેજી ભાષા પર પણ ખાસ મહેનત કરી હતી.
જેસીની માતાએ જણાવ્યું કે આર્થિક મુશ્કેલીઓને કારણે તેને ખાનગી શાળામાંથી સરકારી શાળામાં દાખલ કરવી પડી હતી. છતાં આજે પોતાની દીકરીને આંતરરાષ્ટ્રીય વૈજ્ઞાનિકો સાથે આત્મવિશ્વાસપૂર્વક વાત કરતાં જોઈ પરિવાર ગર્વ અનુભવી રહ્યો છે.
કાર્યક્રમનો આગામી તબક્કો 23 ઓગસ્ટથી નવી દિલ્હીમાં શરૂ થશે, જેમાં પ્રાયોગિક તાલીમ અને રાષ્ટ્રીય અવકાશ દિવસની ઉજવણીનો સમાવેશ થશે. આ દરમિયાન વિદ્યાર્થીનીઓ વૈજ્ઞાનિકો સાથે મળીને સેટેલાઇટ ડિઝાઇન, પેલોડ વિકાસ અને મિશન ઓપરેશન પર કામ કરશે. વિદ્યાર્થીનીઓ દ્વારા તૈયાર કરાયેલ લૂનર ક્યુબસેટનું લોન્ચિંગ 11 ઓક્ટોબરે શ્રીહરિકોટાથી થવાનું છે.
જેસીએ જણાવ્યું કે તેનું અંતિમ સ્વપ્ન ઇસરો (ISRO)માં વૈજ્ઞાનિક તરીકે જોડાવાનું છે અને તે પોતાના માતા-પિતા, શિક્ષકો તથા શાળાનું નામ રોશન કરવા માંગે છે.
