IPL 2023: ગુજરાત સામે બેંગ્લોરની હાર બાદ ફેન્સે શુભમન અને તેની બહેન સાથે કર્યો દુર્વ્યવહાર, જાણો સમગ્ર મામલો

IPL 2023માં રવિવારે અદ્ભુત ડ્રામા જોવા મળ્યો. લીગ રાઉન્ડમાં ગઈકાલે બે વર્ચ્યુઅલ નોકઆઉટ મેચ રમાઈ હતી. મુંબઈ ઈન્ડિયન્સ અને રોયલ ચેલેન્જર્સ બેંગલોર બંનેને પ્લેઓફ માટે ક્વોલિફાઈ કરવા માટે જીતની જરૂર હતી. જો કે, આવું બન્યું ન હતું. મુંબઈએ સનરાઈઝર્સ હૈદરાબાદને હરાવીને પ્લેઓફમાં જગ્યા બનાવી હતી, પરંતુ ગુજરાત ટાઈટન્સની સામે રોયલ ચેલેન્જર્સ બેંગ્લોરની હાર બાદ ટુર્નામેન્ટમાંથી બહાર ફેંકાઈ ગઈ હતી.

શુભમન ગિલની સદીએ વિરાટ કોહલીની સદીને ઢાંકી દીધી હતી. જોકે, આરસીબીના કેટલાક ચાહકો આ હારને પચાવી શક્યા નથી. આ પછી આરસીબીના ચાહકોએ સોશિયલ મીડિયા પર શુભમન અને તેની બહેન માટે અપશબ્દોનો ઉપયોગ કર્યો છે. શુભમનની બહેન શાહનીલ ગિલની ઈન્સ્ટાગ્રામ પોસ્ટ પર ખાસ કરીને ચાહકો ઉગ્ર કોમેન્ટ કરી રહ્યા છે.

શાહનીલે ઘણા સમય પહેલા ઈન્સ્ટાગ્રામ પર ગુજરાત વિ લખનૌ મેચની તસવીર શેર કરી હતી. તેના કેપ્શનમાં તેણે લખ્યું - કેટલો શાનદાર દિવસ હતો. ઘણા ચાહકોએ આ પોસ્ટ પર શાહનીલ અને શુભમન બંને માટે અપમાનજનક ટિપ્પણીઓ લખી હતી. સાથે જ કેટલાક લોકોએ આમ ન કરવાની અપીલ પણ કરી હતી. શુભમન અને તેની બહેન માટે અભદ્ર ટિપ્પણીઓ જોઈને, ઘણા ચાહકો ટ્વિટર પર આવ્યા અને દુરુપયોગ કરનારાઓની નિંદા કરી.