RCB vs MI: RCBએ મુંબઈ ઈન્ડિયન્સને 8 વિકેટે હરાવ્યું, વિરાટ કોહલી અને ડુપ્લેસિસે રમી તોફાની ઈનિંગ્સ

RCBએ IPLની 16મી સિઝનમાં જીત સાથે શરૂઆત કરી છે. તેઓએ તેમની પ્રથમ મેચમાં મુંબઈ ઈન્ડિયન્સને આઠ વિકેટે હરાવ્યું હતું. કેપ્ટન ફાફ ડુપ્લેસીસ અને અનુભવી બેટ્સમેન વિરાટ કોહલીએ ટીમને જીત તરફ દોરી હતી. બંને અનુભવી બેટ્સમેનોએ અડધી સદીની ઇનિંગ્સ રમી હતી. આ મેચમાં RCBએ ટોસ જીતીને પહેલા બોલિંગ કરવાનો નિર્ણય કર્યો હતો. મુંબઈ ઈન્ડિયન્સે 20 ઓવરમાં સાત વિકેટે 171 રન બનાવ્યા હતા. જવાબમાં આરસીબીની ટીમે 16.2 ઓવરમાં બે વિકેટે 172 રન બનાવીને મેચ જીતી લીધી હતી.

172 રનના ટાર્ગેટનો પીછો કરતા RCBને કોહલી અને ડુપ્લેસીસ દ્વારા શાનદાર શરૂઆત અપાવી હતી. બંનેએ પ્રથમ વિકેટ માટે સદીની ભાગીદારી કરી હતી. કોહલી અને ડુપ્લેસિસે 14.5 ઓવરમાં 148 રન ઉમેર્યા હતા. ડુપ્લેસિસ 43 બોલમાં 73 રન બનાવીને આઉટ થયો હતો. તેણે પાંચ ચોગ્ગા અને છ છગ્ગા ફટકાર્યા હતા. તેનો સ્ટ્રાઈક રેટ 169.77 હતો. આ સાથે જ કોહલીએ 49 બોલમાં અણનમ 82 રન બનાવ્યા હતા. તેણે પોતાની ઇનિંગમાં છ ચોગ્ગા અને પાંચ છગ્ગા ફટકાર્યા હતા. વિરાટનો સ્ટ્રાઈક રેટ 167.35 હતો. ગ્લેન મેક્સવેલ બે છગ્ગાની મદદથી ત્રણ બોલમાં 12 રન બનાવીને અણનમ રહ્યો હતો. દિનેશ કાર્તિક ખાતું ખોલાવી શક્યો નહોતો.