અમદાવાદ : ભાઈ-બહેન બન્યા બંટી-બબલી, ફ્રેન્ડશીપ ક્લબના નામે કરી કરોડો રૂપિયાની છેતરપિંડી
ફ્રેન્ડશીપના નામે ભાઈ-બહેને કરી કરોડો રૂપિયાની છેતરપિંડી, ભાઈ અને બહેનની સુરતમાંથી LCB પોલીસે કરી છે ધરપકડ.
અમદાવાદ ગ્રામ્ય LCB પોલીસે ફ્રેન્ડશીપ ક્લબના નામે કરોડો રૂપિયાની છેતરપિંડી આચરનારા કોલ સેન્ટરના રેકેટનો પર્દાફાશ કર્યો છે. ગ્રામ્ય LCB પોલીસે સુરત શહેરમાંથી આ કોલ સેન્ટર ઝડપી પાડ્યું છે. કોલ સેન્ટરમાં કોલર તરીકે કામ કરતા ભાઈ-બહેનને પોલીસે ઝડપી પાડ્યા છે. તો ભાઈ-બહેન કેવી રીતે ચલાવતા હતા સમગ્ર રેકેટ, આવો જોઈએ અમારા આ અહેવાલમાં.
આપની સ્ક્રીન પર દેખાતા બન્ને આરોપીઓના નામ શનિ પારેખ અને નેહા પારેખ છે. બન્ને આરોપીઓ સગા ભાઈ-બહેન છે. આરોપી નેહા પારેખ કોલ સેન્ટરમાં કોલર તરીકે કામ કરતી હતી, જ્યારે સની પારેખ ગ્રુપ બનાવી ન્યૂડ ફોટો મોકલવાનું કામ કરતો હતો. જોકે, ગ્રામ્ય LCB પોલીસે આ કોલ સેન્ટરમાં રેડ કરતા બન્ને આરોપીઓની ધરપકડ કરી સમગ્ર રેકેટનો પર્દાફાશ કર્યો છે.
આરોપીઓ પાસેથી 5 સ્માર્ટફોન, 10થી વધુ કોલ સેન્ટરમાં વપરાતી સિસ્ટમ અને 50 હજાર રોકડ રકમ સહિતનો મુદ્દામાલ જપ્ત કર્યો છે. બન્ને આરોપીઓની પ્રાથમિક પૂછપરછમાં તેઓ છેલ્લા એક વર્ષથી આ સમગ્ર રેકેટ ચલાવતા હોવાનું જણાવ્યુ હતું. એક વર્ષમાં 171 જેટલા લોકોને આ રેકેટનો ભોગ બનાવ્યા છે. ચોંકાવનારી વાત તો એ છે કે, આરોપીઓના બેન્ક એકાઉન્ટની તપાસ કરતા છેલ્લા એક વર્ષમાં રૂપિયા 1 કરોડથી વધુની રકમનું ટ્રાન્જેક્શન પણ મળી આવ્યું છે.
જોકે, સમગ્ર રેકેટનો માસ્ટર માઇન્ડ કેલ્વિન ઉર્ફે ભાવેશ જોધાણી સહિત 9 જેટલા આરોપીઓ હાલ વોન્ટેડ છે. પોલીસે કેલ્વિન ધરપકડ માટેના ચક્રો ગતિમાન કર્યા છે, ત્યારે હવે કેલ્વિનની ધરપકડ બાદ જ ચોંકાવનારા અન્ય ખુલાસા પણ બહાર આવે તેવી શક્યતા છે.