અમદાવાદ : ચાલુ બસે IPL મેચ જોવાના ચક્કરમાં BRTS ડ્રાઇવરે લોકોના જીવ જોખમમાં મુક્યા, વિડિયો થયો વાયરલ

અમદાવાદ શહેરમાં IPL મેચ ચાલુ બસે જોવાના ચક્કરમાં લોકોના જીવ જોખમમાં મુકનાર ડ્રાઈવરને ફરજ પરથી મુકત કરવામાં આવ્યો હતો. અમદાવાદ શહેરમાં મ્યુનિસિપલ કોર્પોરેશન સંચાલિત જાહેર પરિવહનની સેવાઓ જેને હવે ખાનગીકરણ કરી દેવામાં આવ્યું છે. જોકે, ખાનગી ઓપરેટરની બસના ડ્રાઈવરો દ્વારા અકસ્માત સર્જવાની અને લોકોના જીવને જોખમમાં મુકવાની ઘટનાઓ વધી રહી છે, ત્યારે AMTS બાદ હવે BRTSનો વિવાદ સામે આવ્યો છે.

અમદાવાદ શહેરની BRTS બસનો ડ્રાઈવર ચાલુ બસે મોબાઈલમાં IPL મેચ જોતો હોવાનો વીડિયો સોશિયલ મીડિયામાં વાઈરલ થયો છે. ડ્રાઈવરના કાનમાં ઇયર બર્ડ્સ અને એક હાથમાં સ્ટીયરિંગ તો બીજા હાથમાં મોબાઈલ ફોનનો આ વીડિયો અંજલી ચાર રસ્તાથી મણીનગરના રૂટની બસનો હોવાનું સામે આવ્યું છે. જોકે, આ મામલે BRTSના ડ્રાઈવરને ફરજ પરથી મુકત કરવામાં આવ્યો હોવાનું પણ જાણવા મળ્યું છે, ત્યારે હાલ તો ચાલુ બસે IPL મેચ જોતા ડ્રાઈવરનો વીડિયો સોશિયલ મીડિયામાં ખૂબ વાયરલ થઈ રહ્યો છે.