એલ.ડી. એન્જિનિયરિંગ કોલેજની ચકચારી ઘટના
હોસ્ટેલમાં રહેતા 20 વર્ષીય વિદ્યાર્થીનો આપઘાત
કોલેજના ખંડેર રૂમમાંથી મૃતદેહ મળતા ચકચાર
પરીક્ષામાં મૃતક મોબાઈલ સાથે ઝડપાયો : પોલીસ
ભવિષ્ય અંગે ડર લાગતા મૃતકે અંતિમ પગલું ભર્યું
અમદાવાદ શહેરની એલ.ડી. એન્જિનિયરિંગ કોલેજની હોસ્ટેલમાં રહેતા 20 વર્ષીય વિદ્યાર્થીનો કોલેજના ખંડેર રૂમમાંથી મૃતદેહ મળી આવતા ચકચાર મચી જવા પામી હતી. મળતી માહિતી અનુસાર, અમદાવાદ શહેરની એલ.ડી. એન્જિનિયરિંગ કોલેજમાં કેમિકલ એન્જિનિયરિંગના ચોથા સેમેસ્ટરમાં અભ્યાસ કરતા 20 વર્ષીય ઉર્વીન નામના વિદ્યાર્થીનો હોસ્ટેલના ત્રીજા માળે 435 નંબરના રૂમમાંથી મૃતદેહ મળી આવ્યો હતો.
મૃતક વિદ્યાર્થીના હાથમાં અને ગળાના ભાગે બ્લેડ માર્યાનાં નિશાન હતા. જે રૂમમાંથી મૃતદેહ મળી આવ્યો છે, તે રૂમ ખંડેર હાલતમાં હતો. મૃતકનો મિત્ર સવારે રૂમ તરફ આવ્યો અને રૂમ બંધ જોયો ત્યારે શંકા ગઈ. આથી રૂમમાં તપાસ કરતા વિદ્યાર્થીનો લોહીથી લથપથ હાલતમાં મૃતદેહ નજરે આવ્યો હતો. જેથી પોલીસને જાણ કરવામાં આવી હતી. પોલીસે ઘટના સ્થળે પહોંચી તપાસ હાથ ધરી હતી.
જોકે, પોલીસની પ્રાથમિક તપાસમાં જાણવા મળ્યું છે કે, મૃતકે જાતે જ બ્લેડ મારી આપઘાત કરી લીધો છે. મૃતકની એક જુલાઈએ પરીક્ષા હતી. જેમાં મૃતક મોબાઈલ સાથે ઝડપાયો હતો. જેથી ભવિષ્ય અંગે ડર લાગતા મૃતકે અંતિમ પગલું ભર્યું હોવાનું સામે આવ્યું છે.