• સાયબર ક્રાઇમ પોલીસને મળી મોટી સફળતા

• રાજસ્થાની ગેંગના 11 સભ્યોની કરી ધરપકડ

• આધારકાર્ડમાં એડ્રેસ બદલીને કરતાં હતા ફ્રોડ

• બેંક એકાઉન્ટ ખોલવા માટે કરતાં હતા ઉપયોગ

• ફ્રોડના નાણાં ટ્રાન્સફર કરાતા હતા : સાયબર ક્રાઇમ

અમદાવાદ સાયબર ક્રાઇમ પોલીસે આધારકાર્ડમાં એડ્રેસ બદલી ચાઈનીઝ ગેંગને મદદ કરી સાઇબર ફ્રોડ આચરતી ગેંગના 11 સભ્યોની ધરપકડ કરી કાયદેસરની કાર્યવાહી હાથ ધરી છે.

અમદાવાદ સાયબર ક્રાઇમ પોલીસને સાઇબર ફ્રોડ કરતી ગેંગના 11 સભ્યોને ઝડપી લેવામાં સફળતા મળી છે. સાયબર ક્રાઇમની ટીમને માહિતી મળતા ચાંદખેડા વિસ્તારમાં આવેલી પાશ્વ રેસિડેન્સીમાં દરોડો પાડ્યો હતો. આ મકાનમાં પોલીસે મુખ્ય આરોપી સુરેશ બિશનોઇ સહિત અન્ય આરોપીઓ મળી આવ્યા હતા.

ઉપરોક્ત મકાનમાં તપાસ કરતા ત્યાંથી 12 મોબાઈલ, 10 ડુપ્લીકેટ આધાર કાર્ડ અને 10 ઓરીજીનલ આધારકાર્ડ, 12 પાનકાર્ડ, 21 ચેકબુક, 10 પાસબુક, 15 સીમકાર્ડ તેમજ 43 એટીએમ, 1 ભાડાકરાર પણ મળી આવ્યા હતા. આરોપી રાકેશ બિશનોઈ પાસેથી એક પિસ્તોલ અને 7 જીવતા કારતૂસ પણ મળી આવ્યા હતા.

આ સાથે જ મકાનમાં રહેતા સુરેશ તેમજ અન્ય લોકોની પૂછપરછ કરતા સામે આવ્યું હતું કે, મકાનમાં રહેનારા તમામ લોકો રાજસ્થાનના જોધપુરના આસપાસના વિસ્તારોમાંથી અમદાવાદ આવ્યા છે, અને તમામ લોકો અમદાવાદમાં આવી તેમના આધાર કાર્ડમાં એડ્રેસ ચેન્જ કરાવી અમદાવાદ સહિત મહારાષ્ટ્રની અલગ અલગ બેન્કમાં એકાઉન્ટ ખોલાવતા હતા. આવી રીતે 26 બેંકમાં ખાતા ખોલાવ્યા હોવાનું પોલીસ તપાસમાં સામે આવ્યું છે.

આ એકાઉન્ટ સાઇબર ફ્રોડમાં ઉપયોગ કરવા માટે ચાઈનીઝ ગેંગને ભાડે આપવામાં આવતા હોવાનો પણ ખુલાસો થયો છે. ટેક્નિકલ એનાલિસિસને આધારે સામે આવ્યું છે કે, આરોપીઓ દ્વારા ભારતના અલગ અલગ 21 જેટલા રાજ્યોમાં તેમણે એકાઉન્ટ ભાડે આપ્યા છે. જેને લઈને તેમના વિરુદ્ધ અત્યાર સુધીમાં ઓનલાઈન 109 જેટલી ફરિયાદો પણ મળી ચૂકી છે. અત્રે ઉલ્લેખનીય છે કે, આધારકાર્ડને લગતી કામગીરી કરતું કોઈ વ્યક્તિ પણ સમગ્ર કેસમાં સામેલ હોવાની પોલીસને શક્યતા દેખાઈ રહી છે.