વલસાડ : મતદાન જાગૃતિ અર્થે તિથલમાં જિલ્લા ચૂંટણી અધિકારીએ "બીચ મેરેથોન"ને પ્રસ્થાન કરાવી...

ભારતના ચૂંટણી પંચ દ્વારા વિધાનસભા ચૂંટણી આગામી ડિસેમ્બર 2022ના SVEEP કેલેન્ડર મુજબ મતદાન જાગૃતિ કાર્યક્રમ અંતર્ગત વધુમાં વધુ મતદાન થાય તે માટે મતદારોમાં મતદાન જાગૃતિ કેળવવા તા. 23-11-2022ના રોજ સવારે 7 કલાકે વલસાડના તિથલ બીચથી સ્વામિનારાયણ મંદિર સુધી બીચ મેરેથોનનું આયોજન કરવામાં આવ્યું હતું.

વલસાડ જિલ્લા ચૂંટણી અધિકારી-વ-જિલ્લા કલેકટર ક્ષિપ્રા આગ્રે અને નાયબ જિલ્લા ચૂંટણી અધિકારી ઉમેશ શાહે લીલી ઝંડી બતાવી બીચ મેરેથોનને પ્રસ્થાન કરાવી હતી. દરિયા કિનારે રહેતા લોકો મતદાન કરવા માટે જાગૃત થાય અને તા. 1 ડિસેમ્બરના રોજ વધુમાં વધુ મતદાન કરે એવા શુભ આશય સાથે "વોટ આપવાનું ભૂલશો નહી"ના બેનર સાથે આ બીચ મેરેથોન યોજાઈ હતી. જેના થકી લોકો સુધી પોતાના મતાધિકારનો ઉપયોગ કરવાનો સંદેશ પહોંચાડવામાં આવ્યો હતો. મેરથોનમાં સામેલ ફર્સ્ટ ટાઈમ વોટર એવા કોલેજના તમામ વિદ્યાર્થીઓને મોબાઈલમાં VALSAD -DEO એપ ડાઉનલોડ કરાવી વોટરના પોલિંગ બુથ વિશે સમજ આપી પોતે તેમજ આસપાસના નાગરિકોને લોકશાહીમાં મતદાન કરાવવા જણાવ્યું હતું. આ મેરેથોનમાં રમત ગમતમાં રસ ધરાવતા વલસાડની કોલેજ અને શાળાઓના વિદ્યાર્થીઓ, જિલ્લાના વ્યાયામ શિક્ષકો, એન.સી.સી.ના વિદ્યાર્થીઓ, સરકારી કર્મચારીઓ તેમજ જુદી જુદી શાળા અને સંસ્થાના વિદ્યાર્થીઓ મોટી સંખ્યામાં ઉપસ્થિત રહ્યા હતા.