અંકલેશ્વર : ધરતી આબા જનજાતિય ગ્રામ ઉત્કર્ષ અભિયાન અંતર્ગત ગડખોલ ગામ ખાતે લોકોને સરકારી યોજનાઓના લાભ અપાયા…

• સરકારનું ધરતી આબા જનજાતિય ગ્રામ ઉત્કર્ષ અભિયાન

• ગડખોલ ગામ ખાતે અભિયાન અંતર્ગત કાર્યક્રમ યોજાયો

• અરજદારોને યોજનાઓનો લાભ એક જ સ્થળેથી અપાયો

• આધારકાર્ડ અને રાશનકાર્ડ સહિતની યોજનાનો સમાવેશ

• મામલતદાર, સરપંચ સહિત લાભાર્થીઓ ઉપસ્થિત રહ્યા

ભરૂચ જિલ્લાના અંકલેશ્વર તાલુકાના ગડખોલ ગામ ખાતે ધરતી આબા જનજાતિય ગ્રામ ઉત્કર્ષ અભિયાન અંતર્ગત કાર્યક્રમનું આયોજન કરવામાં આવ્યું હતું. જેમાં અરજદારોને સરકારી યોજનાઓનો લાભ એક જ સ્થળેથી આપવામાં આવ્યો હતો.

ભારત સરકારે આદિવાસી સમુદાયના સર્વાંગી વિકાસ માટે ધરતી આબા જનજાતિય ગ્રામ ઉત્કર્ષ અભિયાન શરૂ કર્યું છે. આ અંતર્ગત ભરૂચ જિલ્લાના અંકલેશ્વર તાલુકાના ગડખોલ ગામ સ્થિત સિદ્ધેશ્વરી માતા મંદિરના પટાંગણમાં કાર્યક્રમનું આયોજન કરવામાં આવ્યું હતું. અરજદારોને સરકારી કચેરીઓમાં ધક્કા ન ખાવા પડે તે માટે સરકાર દ્વારા સમગ્ર અભિયાન હાથ ધરવામાં આવ્યું છે, ત્યારે આ કાર્યક્રમ અંતર્ગત 10થી વધુ ગામના લોકોને સરકારની વિવિધ યોજનાઓનો લાભ આપવામાં આવ્યો હતો.

આ કેમ્પમાં આધારકાર્ડ, રાશનકાર્ડ, આયુષ્યમાન ભારત કાર્ડ, જાતિનો દાખલો, કિસાન ક્રેડિટ કાર્ડ, પી.એમ કિસાન યોજના અને જનધન એકાઉન્ટ જેવી વિવિધ સરકારી યોજનાઓનો લાભ એક જ સ્થળેથી આપવામાં આવ્યો હતો. વધુમાં નવા અરજદારોની અરજીઓ પણ સ્વીકારવામાં આવી હતી. આ પ્રસંગે અંકલેશ્વર મામલતદાર કરણસિંહ રાજપૂત, ગડખોલ ગામના સરપંચ તેમજ આગેવાનો સહિત મોટી સંખ્યામાં લાભાર્થીઓ ઉપસ્થિત રહ્યા હતા.