એન્ટિલિયા કેસ: નોટ ગણવાનુ મશીન લઈને ફરતી હતી સચિન વાજેની “મિસ્ટ્રી ગર્લ” મીના જ્યોર્જ, NIA સૂત્રોએ કર્યો મોટો દાવો

એન્ટિલિયા કેસના આરોપી સચિન વાજેની સહયોગી મિસ્ટ્રી ગર્લની ઓળખ જાહેર થતાની સાથે વાજેને લગતા ઘણા રહસ્યો બહાર આવવા લાગ્યા છે. એનઆઇએ છેલ્લા 3 દિવસથી એન્ટિલિયા કેસની મિસ્ટ્રી ગર્લ મીના જ્યોર્જની પૂછપરછ કરી રહી છે. મીના જ્યોર્જ એ જ મહિલા છે જે મુંબઈની ટ્રાઇડન્ટ હોટેલમાં જોવા મળી હતી. પૂછપરછ દરમિયાન સચિન વાજે અને મીના જ્યોર્જનું સંયુક્ત ખાતું અને લોકર હોવાનું બહાર આવ્યું છે.

મુંબઈના ડીસીબી બેંકની અંધેરી-વર્સોવા શાખામાંથી બંનેના સંયુક્ત ખાતા અને લોકર મળી આવ્યા છે. સચિન વાજેની ધરપકડ બાદ ખાતામાંથી લગભગ 26 લાખ રૂપિયા ઉપાડવામાં આવ્યા હતા, હવે માત્ર 5 હજાર રૂપિયા બાકી છે. વાજેની ધરપકડ બાદ લોકર પણ ખોલવામાં આવ્યા હતા, જેમાં ફક્ત થોડા દસ્તાવેજો જ બાકી છે. એનઆઈએ વાજે અને મીનાના સંયુક્ત ખાતામાંથી કોણે અને શા માટે પૈસા ઉપાડ્યા તે જાણવા માંગે છે.

પહેલાથી જ ફસાયેલા આ કેસમાં મીના જ્યોર્જનું રહસ્ય ઘણું મોટું છે. એનઆઈએના સૂત્રોના જણાવ્યા મુજબ, મીના કાઉન્ટિંગ મશીન સાથે ફરતી હતી અને ટ્રાઇડન્ટ હોટલ ખાતે વાજાને મળવા ગઈ હતી. મીના સચિન વાજેના પૈસાની સંભાળ લેતી હતી.

એનઆઈએ અનુસાર સચિન વાજે અને મીના જ્યોર્જ વચ્ચે ખૂબ ગાઢ સંબંધ છે. મીના સચિન વાજેના પૈસા સંભાળતી હતી. એનઆઈએને શંકા છે કે મીના જ્યોર્જ મુંબઇના બાર, પબ અને રેસ્ટોરંટમાંથી મેળવેલા પૈસા ઠેકાણે કરતી હતી. મીનાની પૂછપરછમાં વાજેના અન્ય વાતો પણ બહાર આવી શકે છે, હાલમાં સચિન વાજેને 7 એપ્રિલ સુધી એનઆઈએ રિમાન્ડ પર મોકલવામાં આવ્યા છે.