ભરૂચ: નેત્રંગ મોવી રોડ પર અકસ્માતમાં 5 લોકોના મોત,પેસેન્જર કાર ખાઈમાં ખાબકતા સર્જાયો અકસ્માત

ભરૂચના નેત્રંગ તાલુકાના મોવી રોડ પર અજાણ્યા વાહનની ટકકરે કાર ખાઈમાં ખાબકતા 5 લોકોના કરુણ મોત નિપજ્યા હતા.

આજરોજ નેત્રંગ મોવી રોડ પર ગમખ્વાર માર્ગ અકસ્માતમાં 5 લોકોએ જીવ ગુમાવવાનો વારો આવ્યો હતો. આ માર્ગ પરથી એક પેસેન્જર ઇકો કાર મુસાફરોને બેસાડી પસાર થઈ રહી હતી એ દરમ્યાન પુર ઝડપે આવી રહેલ અજાણ્યા વાહને કારણે ટક્કર મારી હતી. જોરદાર ટક્કરના કારણે કાર માર્ગની નીચે ખાઈમાં ખાબકી હતી જેમાં 1 વ્યક્તિનું ઘટના સ્થળે જ કમકમાટી ભર્યું મોત નીપજ્યું હતું જ્યારે બાકીના ઇજાગ્રસ્તોને 108 એમ્બ્યુલન્સ સેવાની મદદથી સારવાર અર્થે રાજપીપળા ખાતે ખસેડવામાં આવ્યા હતા જેમાં ગંભીર ઇજાના પગલે 4 મહિલાઓના સારવાર દરમ્યાન મોત નિપજ્યા હતા.

બનાવના પગલે ઘટના સ્થળે લોકોના ટોળા એકત્રિત થઈ ગયા હતા. બનાવની જાણ થતા જ નેત્રંગ પોલીસનો કાફલો ઘટના સ્થળે દોડી આવ્યો હતો અને અકસ્માતગ્રસ્ત કારને બહાર કાઢી હતી. પોલીસે અકસ્માત સર્જનાર અજાણ્યા વાહનચાલક વિરુદ્ધ ગુનો નોંધી કાયદેસરની કાર્યવાહી હાથ ધરી છે. મૃતકો ખાનગી કંપનીમાં કામ કરતા હતા અને કામ પૂર્ણ કરી ઘરે જઈ રહ્યા હતા એ દરમ્યાન તેઓને કાળ ભરખી ગયો હતો.