ભરૂચ: જિલ્લા પંચાયતની 34 બેઠકો અને 9 તાલુકા પંચાયતની બેઠકો પર ઉમેદવારી પત્રો ભરાયા

ભરૂચ જિલ્લા પંચાયતની 34 બેઠકો અને 9 તાલુકા પંચાયતોની બેઠકો પર ઉમેદવારો દ્વારા ઉમેદવારી પત્રો ભરાયા હતા. ભરૂચ જિલ્લામાં આવનારી પંચાયત ચૂંટણીને લઈ રાજકીય ગરમાવો તેજ બન્યો છે. જિલ્લા પંચાયતની 34 બેઠકો અને તાલુકા પંચાયતની 24 બેઠકો માટે ઉમેદવારી પત્રો ભરવાની પ્રક્રિયા દરમિયાન વિવિધ રાજકીય પક્ષોના ઉમેદવારોમાં ભારે ઉત્સાહ જોવા મળ્યો.ભાજપ, કોંગ્રેસ તેમજ અન્ય રાજકીય પક્ષોના ઉમેદવારો દ્વારા મોટી સંખ્યામાં ઉમેદવારી ફોર્મ ભરવામાં આવ્યા. ખાસ કરીને ભાજપના ઉમેદવારો ભવ્ય રેલી સાથે ફોર્મ ભરવા પહોંચ્યા હતા, જેમાં કાર્યકરો અને સમર્થકોની મોટી ભીડ ઉમટી પડી હતી.

રેલી દરમિયાન ઢોલ-નગારા અને સૂત્રોચ્ચાર સાથે સમગ્ર વાતાવરણ રાજકીય રંગે રંગાયું હતું. કાર્યકરોમાં જીતનો આત્મવિશ્વાસ અને ઉત્સાહ સ્પષ્ટ રીતે જોવા મળ્યો હતો.ચૂંટણી પ્રક્રિયાની શરૂઆત સાથે જ જિલ્લામાં રાજકીય પ્રવૃત્તિઓમાં તેજી આવી છે. આગામી દિવસોમાં પ્રચાર વધુ જોર પકડે તેવી સંભાવના છે, જેના કારણે ભરૂચમાં ચૂંટણીનો માહોલ વધુ ગરમાશે.આવતી ચૂંટણીને લઈને તમામ પક્ષો દ્વારા વ્યૂહરચનાઓ તૈયાર કરવામાં આવી રહી છે, અને ઉમેદવારો મતદારો સુધી પહોંચવા માટે સક્રિય બની ગયા છે.