અંકલેશ્વર : પરિણીતાનો સ્નાન કરતો વિડિયો વાયરલ કરવાની ધમકી આપી દુષ્કર્મ આચરનાર નરાધમની ધરપકડ

ભરૂચ જિલ્લાના અંકલેશ્વર તાલુકામાં એક પરિણીતાનો સ્નાન કરતો વિડિયો ઉતારી વાયરલ કરવાની ધમકી આપી દુષ્કર્મ આચરવા મામલે પોલીસે ગણતરીના કલાકોમાં જ નરાધમની ધરપકડ કરી કાયદેસરની કાર્યવાહી હાથ ધરી છે.

અંકલેશ્વર તાલુકાના એક ગામમાં 24 વર્ષીય પરિણીતાનો ગામમાં જ રહેતા યુવકે વિડીયો બનાવ્યો હતો. આ પરિણીતા સ્નાન કરી રહી હતી, તે દરમ્યાન આ વિડીયો ઉતારવામાં આવ્યો હતો. આ વિડિયો સોશિયલ મિડીયામાં વાયરલ કરવાની ધમકી આપી યુવાને તેની સાથે દુષ્કર્મ આચારવાની શરૂઆત કરી હતી. એટલું જ નહીં, યુવક પરીણિતાને વારંવાર પોતાની સાથે લઇ જઇ શરીરસુખ માણતો હતો. આ દરમિયાન પરીણિતા ગર્ભવતી બની હતી. જે અંગે યુવકને જાણ કરવામાં આવતાં તેણે પરીણિતાને ગર્ભનિરોધક ગોળીઓ આપી ગર્ભ પડાવી નાંખ્યો હતો, ત્યારબાદ અવારનવાર યુવક દ્વારા કરવામાં આવતા બ્લેકમેલથી કંટાળેલી પરીણિતાએ આખરે અંકલેશ્વર શહેર બી’ ડિવિઝન પોલીસ મથકે ફરિયાદ નોંધાવી હતી, ત્યારે પરીણિતા સાથે દુષ્કર્મ આચરવાના મામલે પોલીસે ગુનો નોંધી ગણતરીના કલાકોમાં જ નરાધમની ધરપકડ કરી કાયદેસરની કાર્યવાહી હાથ ધરી છે.