ટ્રમ્પ દ્વારા ટેરિફ પર કામચલાઉ રોક લગાવવાથી એશિયન બજારોમાં તેજી

ગુરુવારે શરૂઆતના કારોબાર દરમિયાન એશિયન બજારો લીલા રંગમાં હતા. લગભગ બધા જ શેરોમાં ઉછાળો જોવા મળ્યો.

ટોક્યો એક્સચેન્જ ખુલ્યાના થોડા સમય પછી જાપાનનો બેન્ચમાર્ક 2,000 પોઈન્ટથી વધુ ઉછળ્યો. રોકાણકારોએ યુએસ પ્રમુખ ડોનાલ્ડ ટ્રમ્પના મોટાભાગના ટેરિફને 90 દિવસ માટે અસ્થાયી રૂપે રોકવાના નિર્ણયનું સ્વાગત કર્યું. હકીકતમાં, ટ્રમ્પના નિર્ણય બાદ બુધવારે વોલ સ્ટ્રીટ પર યુએસ શેરબજારોનો ઇતિહાસનો શ્રેષ્ઠ દિવસ રહ્યો. આ પછી, ગુરુવારે એશિયન બજારોમાં પણ તેજી જોવા મળી.

સવારના વેપારમાં જાપાનનો બેન્ચમાર્ક નિક્કી 225 8.8% વધીને 34,510.86 પર પહોંચ્યો. ઓસ્ટ્રેલિયાનો S&P/ASX 200 5.1% વધીને 7,748.00 પર પહોંચ્યો. દક્ષિણ કોરિયાનો કોસ્પી 5.2% વધીને 2,412.80 પોઈન્ટ પર ટ્રેડ થતો જોવા મળ્યો. તેવી જ રીતે, હોંગકોંગનો હેંગ સેંગ 2.8% વધીને 20,821.48 પોઈન્ટ પર પહોંચ્યો, જ્યારે શાંઘાઈ કમ્પોઝિટ 0.6% વધીને 3,207.35 પોઈન્ટ પર ટ્રેડ થતો જોવા મળ્યો. છેલ્લા પાંચ દિવસમાં હેંગ સેંગ ઇન્ડેક્સમાં નોંધપાત્ર ઘટાડો થયો હતો.