પ્રથમ વખત બેન્ક નિફ્ટી 43 હજારની ઉપર બંધ, સેન્સેક્સ 762 પોઈન્ટનો ઉછાળો, નિફ્ટી 18448 પર

ગુરુવારે સેન્સેક્સ 762.10 પોઈન્ટ (1.24%)ના વધારા સાથે 62,272.68 પોઈન્ટના નવા રેકોર્ડ સ્તરે બંધ રહ્યો હતો. તે સમયે નિફ્ટી 216.85 પોઈન્ટ (1.19%)ના વધારા સાથે 18,448.10 પોઈન્ટ પર બંધ રહ્યો હતો. આઈટી સેક્ટરની વૃદ્ધિથી બજાર મજબૂત બન્યું છે. ગુરુવારે બજારમાં આવેલી તેજી વચ્ચે નિફ્ટીએ છેલ્લા 52 સપ્તાહના સર્વોચ્ચ સ્તરને વટાવીને 18484ના સ્તરે બંધ થયું હતું. બીજી તરફ બેંક નિફ્ટી પ્રથમ વખત 43 હજારનો આંકડો પાર કરીને 43075ના સ્તરે બંધ રહ્યો હતો. ગુરુવારના ટ્રેડિંગ સેશનમાં 43163 પોઈન્ટ પર પહોંચી ગયો હતો.

આઈટી ઈન્ડેક્સ, ફાઈનાન્સિયલ સર્વિસિસ, ઓઈલ એન્ડ ગેસ અને બેન્ક નિફ્ટીએ બજારની મજબૂતાઈમાં સૌથી વધુ ફાળો આપ્યો હતો. આ સમયગાળા દરમિયાન એપોલો હોસ્પિટલ્સ, એચડીએફસી લાઈફ, બીપીસીએલ, ઈન્ફોસિસ અને ટાટા કન્ઝ્યુમર ટોપ ગેઈનર્સ તરીકે ટ્રેડિંગ કરતા જોવા મળ્યા હતા. બીજી તરફ સિપ્લા, કોલ ઈન્ડિયા, બજાજ ફાઈનાન્શિયલ સર્વિસ, કોટક મહિન્દ્રા બેંક અને ટાટા મોટર્સ જેવા શેરોમાં ઘટાડો જોવા મળ્યો હતો. ડૉલરના મુકાબલે રૂપિયો 21 પૈસા સુધરીને 81.63 પર બંધ થયો હતો.