રશિયા પાસેથી સસ્તું ક્રૂડ ઓઈલ ખરીદીને ભારતે બચાવ્યા 40,965 કરોડ રૂપિયા, પશ્ચિમી દેશોએ લગાવ્યા છે પ્રતિબંધો.!

રશિયા પાસેથી ક્રૂડ ઓઈલ (ક્રૂડ)ની ખરીદી પર ભારતે ગત નાણાકીય વર્ષમાં $5 બિલિયન (આશરે રૂ. 40,965 કરોડ)ની બચત કરી છે. યુક્રેન યુદ્ધને કારણે પશ્ચિમી દેશો દ્વારા મોસ્કો પર લાદવામાં આવેલા પ્રતિબંધોને પગલે રશિયા હાલમાં વિશ્વમાં સૌથી સસ્તું તેલ વેચી રહ્યું છે. આનો ફાયદો ઉઠાવીને ભારતે 2022-23માં રશિયા પાસેથી મોટા પ્રમાણમાં તેલની ખરીદી કરી હતી.

બેંક ઓફ બરોડાના રિપોર્ટ અનુસાર, 2022-23માં ભારતે 162.1 બિલિયન ડોલરનું ક્રૂડ ઓઈલ ખરીદ્યું છે. તે નાણાકીય વર્ષ દરમિયાન ક્રૂડ ઓઈલના ભાવ પ્રતિ બેરલ $75 થી $130 ની રેન્જમાં હતા. ભારતે ટોચના ચાર દેશો પાસેથી સરેરાશ $685 પ્રતિ ટનના ભાવે ક્રૂડ ખરીદ્યું હતું. જો આમાંથી રશિયાની ખરીદી દૂર કરવામાં આવે તો આ કિંમત પ્રતિ ટન $704 થઈ જાય છે.

આંકડા અનુસાર, ભારતે રશિયા પાસેથી પ્રતિ ટન $615 ના ભાવે તેલ ખરીદ્યું છે. નાઇજીરીયાથી $790માં અને ઈરાકમાંથી $636માં ખરીદ્યું. આ રીતે ભારતે રશિયા પાસેથી સસ્તા તેલનો ઉપયોગ કરીને $5 બિલિયનની બચત કરી. આંકડા દર્શાવે છે કે યુક્રેન યુદ્ધ પહેલા રશિયા વિશ્વનું સૌથી મોંઘું તેલ પૂરું પાડતું હતું. પરંતુ યુદ્ધ પછી તેની કિંમતોમાં નોંધપાત્ર ઘટાડો થયો.