ભરૂચ: મેઘરાજાના મેળામાં આઠમના પર્વ પર મોટી સંખ્યામાં માનવ મહેરામણ ઉમટયુ, પોલીસની ડ્રોન કેમેરાથી નજર

ભરૂચમાં સાતમથી દશમ સુધી યોજાતા મેઘરાજાના ભાતીગળ મેળામાં આજરોજ આઠમ નિમિત્તે મોટી સંખ્યામાં માનવ મહેરામણ ઉમટયુ હતુ તો બીજી તરફ પોલીસ દ્વારા સુરક્ષા વ્યવસ્થાના ભાગરૂપે ચાંપતો બંદોબસ્ત ગોઠવવામાં આવ્યો હતો.

ભરૂચમાં 250 વર્ષ કરતા વધુ વર્ષોથી ઉજવાતા અને ભરુચની સાંકૃતિક ઓળખ સમા છડી  મેઘરાજાના ધાર્મિક લોક મેળામાં ગોકુળ અષ્ટમીના દિને ભારે માનવ મેદની ઉમટી હતી. દેશમાં એકમાત્ર ભરૂચ શહેરમાં છપ્પનીયા દુકાળ પહેલાના સમયથી ઉજવાતા મેઘરાજા અને છડીનો  મેળો મહાલવા તેમજ દર્શન માટે રાજયભરમાંથી શ્રદ્ધાળુઓ ગોકુળ અષ્ટમીના દિને ઉમટતા ભારે ભીડ જોવા મળી રહી હતી.

ભરૂચમાં વસતા ભોઇ સમાજ દ્વારા ઉજવાતા તેમના પરંપરાગત તહેવાર મેઘરાજા ઉત્સવની ઉજવણીનો પ્રારંભ થયાના બીજા દિવસે ગોકુળ અષ્ટમી હોય લોકોમાં પણ ભારે ઉત્સાહ જોવા મળી રહ્યો હતો.છડી મેઘરાજાના ઉત્સવને લઈને સોનેરી મહેલ થી ભોઇવાડ સુધીના સમગ્ર વિસ્તારમાં વિવિધ ખાણી પીણી તેમજ રમકડાં ,ગૃહ ઉપયોગી વસ્તુઓના સ્ટોલ ઉભા કરાયા છે.તો  ભોઈવાડના ઘોઘારાવ  મંદિરે છડી ઝુલાવવા સહિતના પરંપરાગત ધાર્મિક કાર્યક્રમોના આયોજન કરાયા છે.જેમાં  દર્શન પૂજન અર્થે પણ મોટી સંખ્યામા લોકો ઉમટી રહ્યા છે.મેઘરાજાના દર્શન માટે લાંબી લાઈનો જોવા મળી રહી હતી.

સંવેદનશીલ ગણાતા ભરૂચમાં ભાતીગળ મેળાના આયોજનને ધ્યાને લઇ પોલીસ દ્વારા સુરક્ષાએ વ્યવસ્થા સઘન બનાવવામાં આવી છે. મેળા વિસ્તારમાં ડ્રોન અને સીસીટીવી કેમેરા દ્વારા સતત મોનિટરિંગ કરવામાં આવી રહ્યું છે. સાથે જ મેળાના મધ્ય ભાગમાં ખાસ પોલીસ કંટ્રોલ રૂમ ઉભો કરવામાં આવ્યો છે જ્યાંથી સમગ્ર વિસ્તારમાં નજર રાખવામાં આવી રહી છે.સાથે જ ચુસ્ત પોલીસ બંદોબસ્ત પણ ગોઠવવામાં આવ્યો છે.