ભારતીયો માટે H1B વિઝા મુશ્કેલ, ટ્રમ્પ સરકારના નવા કડક નિયમો લાગુ

અમેરિકામાં કામ કરવાની ઈચ્છા ધરાવતા હજારો ભારતીયો માટે તાજા ફેરફારો ચિંતાનો વિષય બની રહ્યા છે, કારણ કે યુએસ પ્રમુખ ડોનાલ્ડ ટ્રમ્પના વહીવટીતંત્રએ H1-B વિઝા પ્રક્રિયાને અત્યાર સુધીની તુલનામાં વધુ કડક બનાવી દીધી છે. તાજેતરમાં જાહેર કરાયેલા નવા આદેશ મુજબ હવે H1-B વિઝા માટે અરજી કરતી વખતે ઉમેદવારોને વધુ વિગતવાર અને વિસ્તૃત તપાસમાંથી પસાર થવું પડશે. રોઇટર્સના અહેવાલ મુજબ, અમેરિકાના સ્ટેટ ડિપાર્ટમેન્ટે વિશ્વભરના તમામ યુએસ મિશન્સને એક વિગતવાર કેબલ મોકલીને નવી સ્ક્રુટિની નીતિ તરત જ અમલમાં મૂકવા કહ્યું છે.

ખાસ નોંધનીય બાબત એ છે કે, જો કોઈ અરજદાર અથવા તેના કાર્ય સાથે સંકળાયેલ વ્યક્તિએ ભૂતકાળમાં ઑનલાઇન અભિવ્યક્તિ દબાવવા, કન્ટેન્ટ સેન્સર કરવા કે વાણી સ્વાતંત્ર્યને મર્યાદિત કરવાની પ્રવૃત્તિઓમાં ભાગ લીધો હોય, તો તેની વિઝા અરજી સીધી રદ થઈ શકે છે. ભારતીયોને તેનો સૌથી મોટો ફટકો લાગી શકે છે, કારણ કે H1-B વિઝા ધારકોમાં ભારતીયોની ટકાવારી 70%થી વધુ રહે છે.

સ્ટેટ ડિપાર્ટમેન્ટના તાજેતરના સૂચન મુજબ હવે માત્ર વિઝા અરજદારો જ નહીં પરંતુ તેમના પરિવારના સભ્યોના પ્રોફેશનલ બેકગ્રાઉન્ડની પણ સંપૂર્ણ તપાસ કરવામાં આવશે. યુએસ કોન્સ્યુલર અધિકારીઓને આદેશ આપવામાં આવ્યો છે કે તેઓ અરજદારોના રિઝ્યૂમે, LinkedIn પ્રોફાઇલ, કામનો ઇતિહાસ, પ્રોજેક્ટ્સ અને ડિજિટલ પ્રવૃત્તિઓને વધુ સાવધાનીથી ચકાસે.

ખાસ કરીને કન્ટેન્ટ મોડરેશન, ફેક્ટ-ચેકિંગ, પાલન, ઑનલાઇન સલામતી, સોશિયલ મીડિયા મેનેજમેન્ટ જેવા ક્ષેત્રોમાં કાર્યરત ઉમેદવારોને સૌથી વધુ અસર થશે, કારણ કે આ કામોમાં અભિવ્યક્તિ નિયંત્રણ અથવા સેન્સરશીપના તત્ત્વો સીધી રીતે જોડાયેલા હોય છે. અગાઉ H1-B શ્રેણીમાં આટલી કડક તપાસ ક્યારેય જોવા મળેલી નથી, અને નિષ્ણાતો માને છે કે આ પગલાથી ટેક ઇન્ડસ્ટ્રીમાં ભરતી પ્રક્રિયા ધીમી પડી શકે છે તથા ભારતીય પ્રતિભા પર તેની વિશાળ અસર થઈ શકે છે.