ભરૂચ જિલ્લામાં આવતીકાલે 11 કેન્દ્ર પર જીપીએસસીની પરીક્ષા યોજાશે જોકે આ પરીક્ષા દરમિયાન પરીક્ષાખંડમાં સીસીટીવી કેમેરાને ઢાંકી દેવા આશ્ચર્યજનક પરિપત્ર કરવામાં આવ્યો છેમઆયોગના પરિપત્રને ટાંકીને ભરૂચ કલેકટર કચેરી દ્વારા તમામ સેન્ટરના સંચાલકોને સીસીટીવી કેમેરા DVR બંધ કરી કેમેરા ઢાંકી દેવા જણાવવામાં આવ્યું છે

ભરૂચ જિલ્લામાં આગામી 22 ડિસેમ્બરે જીપીએસસીની પરીક્ષા યોજાવા જઇ રહી છે.ભરૂચ જિલ્લામાં કુલ 11 કેન્દ્રો પર 101 બ્લોકનું આયોજન કરવામાં આવશે. જેમાં 2,417 ઉમેદવારો પરીક્ષા આપશે. પરીક્ષાનો સમય સવારે 11 થી 1 વાગ્યા સુધીનો રહેશે જોકે પરીક્ષા અંગે ભરૂચ કલેકટર કચેરીનો એક ચોંકાવનારો પરિપત્ર બહાર આવ્યો છે.

આ પરિપત્રમાં પરીક્ષા ખંડમાં લગાવેલ સીસીટીવી કેમેરા રૂમાલથી ઢાંકી દેવા અને કેમેરાનું ડીવીઆર બંધ કરી દેવા જે તે સેન્ટરના સંચાલકોને સૂચના આપવામાં આવી છે.અગાઉની પરીક્ષાઓમાં પરીક્ષાના આગલા દિવસે શાળા છૂટ્યા બાદથી પરીક્ષા પૂર્ણ થવા સુધીનું સીસીટીવી કેમેરાનું રેકોર્ડિંગ જમા કરાવવાનો નિયમ હતો પરંતુ આ વખતે આ નિયમ જ કાઢી નાંખવામાં આવ્યો છે.

નવા પરિપત્રમાં જણાવ્યા અનુસાર આ પ્રાથમિક કસોટીમાં આયોગ દ્વારા HD કેમેરા ધરાવતી શાળામાં HD કેમેરા પરીક્ષા દરમિયાન બંધ રાખવા આદેશ કરાયો છે.શનિવારના રોજ શાળાની આયોગના પ્રતિનિધિએ રૂબરૂ મુલાકાત લઈ શૈક્ષણિક સમય પૂર્ણ થયા બાદ HD કેમેરાનું DVR બંધ કરીને HD કેમેરાને કવરથી ઢાંકવાનું રહેશે અને તેનો અહેવાલ કલેકટર કચેરી અને જિલ્લા શિક્ષણાધિકારીને મોકલવાનો રહેશે.

સામાન્યત: આ પ્રકારની પરીક્ષાઓ દરમિયાન પરીક્ષા ખંડમાં સીસીટીવી કેમેરા ફરજિયાત હોય છે પરંતુ આ વખતે યોજાનારી પરીક્ષામાં આ કેમેરા બંધ રાખવાનો નિર્ણય લેવામાં આવ્યો છે જે ખૂબ જ આશ્ચર્યજનક છે ત્યારે આ અંગે અનેક ગુજરાત દ્વારા ગાંધીનગર કક્ષાએ તપાસ કરતા જાણવા મળ્યું હતું કે હાલ જીપીએસસીના ચેરમેન હસમુખ પટેલ છે અને તેઓ એક સક્ષમ પોલીસ અધિકારી રહી ચૂક્યા છે ત્યારે પરીક્ષા ખંડમાં લગાવવામાં આવેલા એચ.ડી. ક્વોલિટીના સીસીટીવી કેમેરાને ઝૂમ કરીને તેમાંથી પ્રશ્નપત્રને વાંચી શકાય છે. આ પ્રશ્નપત્ર વાંચ્યા બાદ બહાર તે લીક થઈ શકે એવી સંભાવનાને જોતા આ આશ્ચર્યજનક પરંતુ આવકારદાયક નિર્ણય લેવામાં આવ્યો છે.