ભોલા એડવાન્સ બુકિંગ કલેક્શન: રિલીઝના એક અઠવાડિયા પહેલા જ ભોલાએ કરી બમ્પર કમાણી..!

'દ્રશ્યમ 2'ની સફળતા બાદ હવે અજય દેવગન ફરી એકવાર સ્ક્રીન પર વાપસી કરવાની તૈયારી કરી રહ્યો છે. તેની ફિલ્મ 'ભોલા' 30 માર્ચે સિનેમાઘરોમાં રિલીઝ થઈ રહી છે. જ્યારે ફિલ્મનું ટ્રેલર અને પોસ્ટર રિલીઝ થયા ત્યારથી લોકો તબ્બુ અને અજય દેવગન સ્ટારર ફિલ્મની રિલીઝની રાહ જોઈ રહ્યા છે.

'ભોલા'ની રિલીઝને એક સપ્તાહ બાકી છે, પરંતુ લોકોમાં આ એક્શન ફિલ્મ માટે કેટલો ક્રેઝ છે, તેનો અંદાજ તમે આ ફિલ્મના એડવાન્સ બુકિંગ અને તેની કમાણી પરથી જ લગાવી શકો છો. એટલું જ નહીં સિનેમા હોલ પણ લગભગ ભરાઈ ગયા છે.

અજય દેવગન પોતે પણ ભોલાને લઈને ખૂબ જ ઉત્સાહિત છે. આ ફિલ્મમાં તે માત્ર અભિનય જ નથી કરી રહ્યો, પરંતુ તેણે પોતે જ આ ફિલ્મનું દિગ્દર્શન પણ કર્યું છે. અજય દેવગણની ભોલા એ તમિલ ફિલ્મ 'કૈથી'ની હિન્દી રિમેક છે, જે OTT પ્લેટફોર્મ પર પહેલેથી જ ઉપલબ્ધ છે.

જો કે ફિલ્મને જે રીતે રિસ્પોન્સ મળી રહ્યો છે તે જોવા જેવો છે. બોક્સ ઓફિસ વેબસાઈટ સચનિલ્કના રિપોર્ટ અનુસાર, ભોલાએ અત્યાર સુધીમાં એડવાન્સ બુકિંગના ત્રણ દિવસમાં લગભગ 1 કરોડની કમાણી કરી છે. જે રીતે ભોલાની ટિકિટો વેચાઈ રહી છે તે જોતા એવું કહેવું ખોટું નહીં હોય કે અજય દેવગનની ફિલ્મ પહેલા દિવસે ડબલ ડિજિટ સાથે ઓપનિંગ કરી શકે છે.