દીપિકા, રણવીર અને રણબીર સાથે લવ ટ્રાયંગલ ‘સંગમ’ ફિલ્મની રિમેકની યોજના, કરણ જોહરે કર્યો ખુલાસો....

કરણ જોહર તેના લેટેસ્ટ શો કોફી વિથ કરણ સીઝન 8ને લઈને ખૂબ જ ચર્ચામાં છે. આ શોનો પહેલો એપિસોડ બોલિવૂડના પાવર કપલ રણવીર સિંહ અને દીપિકા પાદુકોણ આવ્યા હતા. જેમાં પ્રેક્ષકોને પ્રેમ, રોમાન્સ, મસ્તી અને ડાન્સનો સ્વાદ જોવા મળ્યો હતો. જોકે, આ શો દરમિયાન કરણ જોહરે રણવીર, દીપિકા અને રણબીર કપૂરના રી-યુનિયનની પણ જાહેરાત કરી છે. કરણ જોહરે પોતાના એક ચેટ શોમાં પ્રણય ત્રિકોણ પર આધારિત ફિલ્મ બનાવવાની ઇચ્છા વ્યક્ત કરી છે. કરણ જોહર આ ત્રિપુટીને લઇને સ્વ. રાજકપૂરની યાદગાર ફિલ્મ સંગમની રિમેક બનાવવા માંગે છે. ઉલ્લેખનીય છે કે, રણવીર સિંહ સાથે લગ્ન કરતાં પહેલાં દીપિકા પદુકોણ અને રણબીર કપૂર ગાઢ પ્રેમમાં હતા. તેમનું બ્રેકઅપ થયાપછી દીપિકા પદુકોણ ડિપ્રેશનમાં જતી રહી હતી. રણબીર કપૂરના સ્વ. દાદા રાજકપૂર નિર્મિત અને દિગ્દર્શિત , લવ ટ્રાયન્ગલ પર આધારિત ફિલ્મ સંગમ વર્ષ ૧૯૬૪માં સુપરહિટ રહી હતી. આ ફિલ્મમાં રાજ કપૂર, વૈજયંતિ માલા અને રાજેન્દ્ર કુમારે મુખ્ય રોલ કર્યા હતા. એટલું જ નહીં વિદેશમાં શૂટિંગ થનારી ભારતની આ પ્રથમ ફિલ્મ હતી. ઉપરાંત ૨૩૮ મિનીટની અવધિ સાથે સૌથી લાંબી ચાલનારી ભારતીય ફિલ્મ હતી.