અમદાવાદ : નશામાં ધૂત પોલીસકર્મીએ બેફામ કાર હંકારીને રિક્ષાને લીધી અડફેટમાં, કારમાંથી મળી બિયરની બોટલ

• નશામાં ધૂત પોલીસકર્મીનું કારસ્તાન

• બેફામ કાર હંકારીને રિક્ષાને ફંગોળી

• સ્થાનિકોએ પોલીસકર્મીને ઝડપી લીધો

• કારની તલાશી લેતા બિયરની મળી બોટલ

• એમ ડિવિઝન ટ્રાફિક પોલીસે કરી કાર્યવાહી  

અમદાવાદના વિશાલા સર્કલ પાસે બુધવારે મોડી રાત્રે એક પોલીસ કર્મચારીએ નશાની હાલતમાં બેફામપણે કાર ચલાવી એક રિક્ષાને જોરદાર ટક્કર મારતા ચકચાર મચી ગઈ હતી.આ ઘટનામાં પોલીસ કર્મચારી નશાની હાલતમાં હતો અને તેની કારમાંથી બિયરની બોટલ પણ મળી આવી હતી.

અમદાવાદના વિશાલા સર્કલ પાસે બુધવારે મોડી રાત્રે એક પોલીસ કર્મચારીએ નશાની હાલતમાં બેફામપણે કાર ચલાવી એક રિક્ષાને જોરદાર ટક્કર મારતા ચકચાર મચી ગઈ હતી. આ અકસ્માત એટલો ભયાનક હતો કે રિક્ષા પલટી ખાઈ ગઈ હતી અને તેના ચાલકને ગંભીર ઈજાઓ પહોંચતા બેભાન અવસ્થામાં તાત્કાલિક હોસ્પિટલમાં ખસેડવામાં આવ્યો હતો. આ ઘટનાને પગલે એકઠા થયેલા રોષે ભરાયેલા લોકોએ કારચાલક પોલીસકર્મીને પકડીને પોલીસને હવાલે કર્યો હતો.

અકસ્માત સર્જનાર પોલીસ કર્મચારીની ઓળખ પ્રકાશ વેરશીભાઇ રબારી તરીકે થઈ છે, જે વટવા પોલીસ સ્ટેશનમાં નોકરી કરે છે. તે પોતાની કારને વિશાલા સર્કલ પાસેથી પૂરઝડપે અને બેફામ રીતે હંકારી રહ્યો હતો. આ દરમિયાન તેણે કાબૂ ગુમાવતા આગળ જઈ રહેલી એક રિક્ષાને પાછળથી ટક્કર મારી હતી. આ ટક્કર એટલી પ્રચંડ હતી કે રિક્ષા હવામાં ફંગોળાઈને પલટી મારી ગઈ હતી, જેના કારણે રિક્ષાચાલકને માથા અને શરીરના અન્ય ભાગોમાં ગંભીર ઈજા પહોંચી હતી.

ઘટનાસ્થળે હાજર લોકોના જણાવ્યા મુજબ, કારચાલક પ્રકાશ રબારી નશામાં ધૂત હતો. અકસ્માત બાદ લોકોનું ટોળું એકઠું થઈ ગયું હતું અને તેમણે પ્રકાશ રબારીને કારમાંથી બહાર કાઢી પકડી લીધો હતો. આ ઘટનાની જાણ થતાં જ સ્થાનિક પોલીસનો કાફલો ઘટનાસ્થળે દોડી આવ્યો હતો.

અકસ્માતગ્રસ્ત કારની તલાશી લેતા તેમાંથી પોલીસની વરદી, બિયરની ખાલી બોટલો અને કારની બીજી નંબર પ્લેટ પણ મળી આવી હતી. આ વસ્તુઓ મળ્યા બાદ લોકોનો રોષ વધુ ભભૂકી ઉઠ્યો હતો.આ સમગ્ર મામલે એમ ડિવિઝન ટ્રાફિક પોલીસે આરોપી પોલીસ કર્મચારી પ્રકાશ રબારી વિરુદ્ધ ગુનો નોંધી વધુ તપાસ હાથ ધરી છે.