• કાર ચાલકનો નશાની હાલતમાં રફતારનો કહેર

• રાંદેસણ પાસે સિટીપલ્સ સર્વિસ રોડ પરની ઘટના

• કાર ચાલકે રાહદારી અને વાહનોને અડફેટે લીધાં

• ગંભીર દુર્ઘટનામાં 4 લોકોના કરૂણ મોત નિપજ્યાં

• CCTV ફૂટેજના આધારે પોલીસે તપાસ હાથ ધરી

ગાંધીનગરના રાંદેસણ વિસ્તારમાં નશાની હાલતમાં કારના બેદરકાર ચાલકે કેટલાક રાહદારી સહિત વાહનચાલકોને અડફેટે લીધા હતા. આ દુર્ઘટનામાં એક મહિલા સહિત 4 લોકોના મોત નીપજ્યાં છે, જ્યારે અન્ય લોકો ગંભીર રીતે ઘાયલ થયા છે. તો બીજી તરફ, CCTV ફૂટેજના આધારે પોલીસે વધુ તપાસ હાથ ધરી છે.

ગાંધીનગરના રાંદેસણ વિસ્તારમાંથી અકસ્માતની ગંભીર ઘટના સામે આવી છે. રાંદેસણના ભાઇજીપુરાથી સિટીપલ્સવાળા સર્વિસ રોડ પર અકસ્માત સર્જાયો હતો. નશાની હાલતમાંGJ-18-EE-7887 નંબરની ટાટા સફારી કારના બેદરકાર ચાલકે રાહદારી સહિત વાહનચાલકોને અડફેટે લેતાં આ દુર્ઘટનામાં એક મહિલા સહિત 4 લોકોના મોત નીપજ્યાં છે, જ્યારે અન્ય ઘણા લોકો ગંભીર રીતે ઘાયલ થયા હોવાનું જાણવા મળ્યું છે. ઘાયલ લોકોને તાત્કાલિક નજીકની હોસ્પિટલમાં સારવાર અર્થે ખસેડવામાં આવ્યા છે, જ્યાં તેમની સારવાર ચાલી રહી છે.

જોકે, આ કાર હિતેશ વિનુભાઇ પટેલના નામે નોંધાયેલી છે, અને અકસ્માત સર્જનાર કોઈ અન્ય ચાલક હોવાનું સામે આવ્યું છે, જ્યારે નજીકમાં શુકન સ્કાય બિલ્ડિંગનાCCTVમાં સમગ્ર ઘટના કેદ થવા પામી છે. જેમાં સ્પષ્ટ જોઈ શકાય છે કે, કારની સ્પીડ લગભગ 100થી વધુ હશે. આ તરફ, બનાવની જાણ થતાં જ પોલીસ કાફલો તાત્કાલિક ઘટના સ્થળ પર દોડી આવ્યો હતો, જ્યાંCCTV ફૂટેજ અને સ્થાનિક લોકોના નિવેદનોના આધારે અકસ્માતની તપાસ હાથ ધરવામાં આવી હતી. આ દરમિયાન પોલીસે કારના બેદરકાર ચાલકને રાઉન્ડઅપ કરી લીધો હોવાની વિગત પણ સામે આવી છે. અત્રે ઉલ્લેખનીય છે કે, આ દુર્ઘટનાને લઈને સ્થાનિક લોકોમાં ભય અને રોષ ફેલાયો છે. લોકો વાહનચાલકોને વધુ જવાબદાર બનવાની અપીલ કરી રહ્યા છે, અને બેદરકારીભર્યા ડ્રાઈવિંગ સામે કડક પગલાં લેવા માટે માંગ કરી રહ્યા છે.