બનાસ ડેરીનું સિમેન સેન્ટર પશુપાલકો માટે આશીર્વાદરૂપ,સેક્સ શોર્ટીંગ મશીનથી વાછરડીના જન્મનાં દરમાં થશે વધારો

• બનાસ ડેરીના સિમેન સેન્ટરનો થયો છે પ્રારંભ

• દેશનું પ્રથમ સ્વદેશી સિમેન સેક્સ શોર્ટીંગ મશીન

• આ સેન્ટર પશુપાલકો માટે આશીર્વાદરૂપ

• વાછરડીની જન્મની શક્યતામાં થશે વધારો

• દૂધ ઉત્પાદનમાં પણ થશે વૃદ્ધિ  

બનાસકાંઠાની બનાસ ડેરીએ દેશનું પ્રથમ સ્વદેશી સિમેન સેક્સ શોર્ટીંગ મશીન વિકસાવ્યું છે. આ મશીનના કારણે વાછરડીની જન્મની શક્યતા 90 ટકા વધશે. આ સંશોધનથી ગુજરાતમાં દૂધ ઉત્પાદનમાં વૃદ્ધિ થશે તેમજ રખડતા ઢોરની સમસ્યાના નિયંત્રણ માટે પણ મહત્વપૂર્ણ સાબિત થશે,અને પશુપાલકો માટે પણ આ મશીન આશીર્વાદરૂપ પુરવાર થશે.

બનાસ ડેરીના દામા સીમેન સ્ટેશનમાં સ્થાપિત થયેલા સ્વદેશી સિમેન સેક્સ શોર્ટીંગ મશીન, બળદના શુક્રાણુમાંથી વાછરડીના જન્મ માટે ઉપયોગી સેલ એટલે કે કોષનું વર્ગીકરણ કરે છે. જેના પગલે વાછરડીના જન્મની શક્યતા 90 જેટલી વધશે. પરિણામે દૂધાળા પશુઓની સંખ્યા વધશે. હાલ, નેશનલ ડેરી ડેવલપમેન્ટ બોર્ડની 'GauSort' ટેકનોલોજી પશુઓની ઉન્નત જાત-સંવર્ધનમાં ઉપયોગી બની રહી છે.

 ભારતની સૌથી મોટી દૂધ સહકારી સંસ્થાઓ પૈકીની એક બનાસ ડેરી ચાર લાખથી વધુ ખેડૂતો પાસેથી દરરોજ 60 લાખ લીટર દૂધ એકત્રિત કરે છે. ગીર અને સાહિવાલ જેવી વધુ દુધ આપતી જાતિને પ્રોત્સાહન માટેના પ્રયાસો પહેલાથી જ સમગ્ર પ્રદેશમાં થયા છે. જેના પરિણામે દૂધ ઉત્પાદનમાં નોંધપાત્ર વૃદ્ધિ  નોંધાઈ છે.

કુલ વીસ એકરમાં ફેલાયેલું, દામા સિમેન સેન્ટર આશરે વાર્ષિક 25 લાખ ઉચ્ચ ગુણવત્તાવાળા સિમેન ડોઝનું ઉત્પાદન કરે છે. આ દરેક ડોઝને સીમન સ્ટેશન મેનેજમેન્ટ સિસ્ટમ દ્વારા ટ્રેક કરવામાં આવે છે. પશુપાલકોને વિતરણ કરતા પહેલા તેને 30 દિવસ માટે ક્વોરેન્ટાઇન કરવામાં આવે છે.

બનાસ ડેરીના આ સંશોધનના કારણે પ્રતિ ડોઝ હાલની વેચાણ કિંમત રૂપિયા 100 છે, આવનાર સમયમાં તે ઘટીને રૂપિયા ૫૦ થશે. જેનાથી સરવાળે લાખો પશુપાલકોને લાભ થશે.આત્મનિર્ભર ભારતના વિઝનને અનુરૂપ આ સંશોધન ગ્રામીણ ભારતને સશક્ત બનાવશે અને પશુપાલકોનું જીવન-ધોરણ વધુ ઉન્નત બનાવશે.