ભરૂચ : ક્રેડાઇ ભરૂચ દ્વારા ત્રિદિવસીય “ધ રિયલ એસ્ટેટ એન્ડ પ્રોપર્ટી એક્સ્પો”નું આયોજન, વન મંત્રી મુકેશ પટેલના હસ્તે પ્રારંભ

• ભરૂચના રિયલ એસ્ટેટ ક્ષેત્ર માટે એક ઐતિહાસિક ક્ષણ

• ધ રિયલ એસ્ટેટ એન્ડ પ્રોપર્ટી એક્સ્પોનું આયોજન કરાયું

• દૂધધારા ડેરી ગ્રાઉન્ડ ખાતે ત્રિદિવસીય એક્સ્પોનું આયોજન

• રાજ્યમંત્રી મુકેશ પટેલના હસ્તે એક્સ્પોનો પ્રારંભ કરાયો

• ભરૂચના વિકાસ માટે રાજ્ય મંત્રીએ તંત્રનું ધ્યાન દોર્યું

ભરૂચ શહેરમાં રિયલ એસ્ટેટ ક્ષેત્ર માટે એક ઐતિહાસિક ક્ષણરૂપે ક્રેડાઇ ભરૂચ દ્વારા ત્રિદિવસીય ધ રિયલ એસ્ટેટ એન્ડ પ્રોપર્ટી એક્સ્પોનું આયોજન કરવામાં આવ્યું છે, ત્યારે વન અને પર્યાવરણ મંત્રી મુકેશ પટેલની અધ્યક્ષતામાં આજરોજ એક્સ્પોનો પ્રારંભ કરવામાં આવ્યો હતો.

ઔદ્યોગિક વિકાસની સાથે સાથે ભરૂચ જિલ્લામાં રહેણાંકની માગમાં વધારો નોંધાય રહ્યો છે, ત્યારે ભરૂચ શહેરના દૂધધારા ડેરી ગ્રાઉન્ડ ખાતે તા. 22થી 24 ફેબ્રુઆરી-2025 દરમ્યાન ક્રેડાઈ ભરૂચ દ્વારા પ્રોપર્ટી એક્સ્પોનું પ્રથમ વખત આયોજન કરવામાં આવ્યું છે. આજરોજ રાજ્યના વન અને પર્યાવરણ મંત્રી મુકેશ પટેલના હસ્તે ત્રિદિવસીય ધ રિયલ એસ્ટેટ એન્ડ પ્રોપર્ટી એક્સ્પોનો પ્રારંભ કરવામાં આવ્યો હતો.

રાજ્યમંત્રી મુકેશ પટેલે જણાવ્યું હતું કે, રીયલ એસ્ટેટ ક્ષેત્ર પરિવારોને જોડવાનું કામ કરી રહ્યું છે. એક્સ્પોમાં ઈકોફ્રેન્ડલી બાંધકામની નવી ટેકનોલોજી પણ પ્રદર્શિત કરવામાં આવી છે. વધુમાં રાજ્યમંત્રીએ ભરૂચના વિકાસ માટે વહીવટી તંત્રને વધુ ધ્યાન આપવા માટે પણ જણાવ્યું હતું.

આ પ્રસંગે ભરૂચના ધારાસભ્ય રમેશ મિસ્ત્રી, વાગરાના ધારાસભ્ય અરૂણસિંહ રણા, અંક્લેશ્વરના ધારાસભ્ય ઈશ્વર પટેલ, જિલ્લા ભાજપ પ્રમુખ મારુતિસિંહ અટોદરિયા, પૂર્વ ધારસભ્ય દુષ્યંત પટેલ, જિલ્લા કલેક્ટર ગૌરાંગ મકવાણા સહિત ક્રેડાઈ ભરૂચના પ્રેસિડેન્ટ નિષિધ અગ્રવાલ, ચેરમેન રોહિત ચદ્દરવાલા સહિતના હોદ્દેદારો તેમજ મોટી સંખ્યામાં બિલ્ડરો ઉપસ્થિત રહ્યા હતા.