ભરૂચના જંબુસરમાં ટેકાના ભાવે તુવેરની ખરીદી શરૂ કરવામાં આવતા ખેડૂતોમાં ઉમંગનો માહોલ જોવા મળી રહ્યો છે જોકે વહેલી સવારથી જ ખેડૂતોએ લાઈનમાં લાગી જવું પડે છે

ભરૂચના જંબુસર પંથકમાં મોટા પ્રમાણમાં ખેડૂતોએ તુવેરનું વાવેતર કર્યું છે ત્યારે તુવેરના સારા એવા ભાવ ખેડૂતોને મળી રહ્યા છે. જંબુસર તાલુકામાં સરકારના ટેકાના ભાવ પર તુવેર ખરીદી શરૂ થતાં ખેડૂતોમાં ઉમંગ જોવા મળી રહ્યો છે. ગુજરાત એગ્રો નામની એજન્સી દ્વારા યુનિયન જીનની બાજુના કમ્પાઉન્ડમાં તુવેર ખરીદી શરૂ કરવામાં આવી છે ત્યારે વહેલી સવારથી જ ખેડૂતો  ટ્રેક્ટરોમાં તુવેર ભરીને લાઈનમાં લાગી જાય છે. દિવસભર રાહ જોતા રહેવા છતાં પણ તમામ ખેડૂતોની તુવેર ખરીદાઈ શકે તેવી વ્યવસ્થા અપૂરતી જણાઈ રહી છે.

પ્રતિ કવિન્ટલ 7,550 રૂપિયાના ટેકાના ભાવે ખેડૂતો પાસેથી ખરીદી ચાલુ છે જેને લઈ ખેડૂતોમાં ઉત્સાહ જોવા મળ્યો છે. જંબુસરમાં છેલ્લા દસ-બાર દિવસથી ટેકાના ભાવે તુવેરની ખરીદી થઈ રહી છે ત્યારે 23,000 જેટલી બેગની ખરીદી કરવામાં આવી છે ખેડૂતોને અગવડ ન પડે તે માટે ટોકન સિસ્ટમ પણ રાખવામાં આવી છે. રોજના 70 થી 80 ટ્રેક્ટરમાં તુવેર ભરીને ખેડૂતો ટેકાના વેચવા આવે છે.