ભરૂચ : હેલિકોપ્ટર લઈને પરણવા આવેલા યુવકના વિડિયો પર અભદ્ર ટિપ્પણી કરનાર ખેડા-વસો ગામના મહંતની ધરપકડ

• ભરૂચ તાલુકાના નીકોરા ગામે યોજાયા હતા અનોખા લગ્ન

• આદિવાસી સમાજના યુવાને હેલિકોપ્ટરમાં કાઢી હતી જાન

• સોશ્યલ મીડિયા પર વાયરલ પોસ્ટમાં થઈ અભદ્ર ટિપ્પણી

• પોલીસે ખેડા-વસો ગામના મંદિરના પૂજારીની ધરપકડ કરી

• જાતિવાદી ટિપ્પણીઓ બદલ આરોપી વિરુદ્ધ કડક કાર્યાવહી

ભરૂચ લોકલ ક્રાઈમ બ્રાન્ચ પોલીસે ખેડા જિલ્લાના વસો ગામના મંદિરના પૂજારીની ધરપકડ કરી છે. આરોપી પિયુષગીરી ઉર્ફે લાલભાઈ બળદેવગીરી ગૌસ્વામીએ આદિવાસી સમાજના લગ્ન પ્રસંગના વિડિયો પર જાતિવાદી ટિપ્પણીઓ કરી હતી.

ગત તા. 16મી ફેબ્રુઆરી-2025ના રોજ ભરૂચ જિલ્લાના ઝઘડીયા તાલુકાના ખરચી ગામમાં રહેતા આદિવાસી સમાજના યુવકના લગ્ન પ્રસંગ નિમિત્તે હેલિકોપ્ટર મારફતે ભરૂચ તાલુકાના નીકોરા ગામે જાન પહોચી હતી. જે લગ્ન પ્રસંગની જાનનો વિડિયો સોશિયલ મીડિયા પર ખૂબ વાયરલ થયો હતો, ત્યારે 'બોલ સે ભરૂચ પુછશે ભરૂચ' નામના ફેસબુક પેજ પર શેર થયેલા જાનના વિડિયોની પોસ્ટમાં લાલભાઇ નામના એકાઉન્ટ દ્વારા આદિવાસી સમાજ વિરુદ્ધ અપમાનજનક ટિપ્પણીઓ કરવામાં આવી હતી.

આ ટિપ્પણીઓથી સમગ્ર આદિવાસી સમાજમાં રોષ ફેલાયો હતો. સમાજના લોકોએ એકત્ર થઈ વિરોધ પ્રદર્શન કરવા સાથે વહીવટી તંત્રને આવેદન પત્ર આપ્યું હતું, ત્યારે ભરૂચ એસપી મયુર ચાવડાએ આ મામલે તાત્કાલિક કાર્યવાહીના આદેશ આપ્યા હતા. આ સાથે જ ભરૂચ સાયબર ક્રાઇમ પોલીસ મથકમાં એટ્રોસિટી અને આઈટી એક્ટ હેઠળ ગુનો નોંધવામાં આવ્યો હતો. 

LCB પીઆઈ એમ.પી.વાળા અને પોલીસ ઇન્સપેક્ટર એમ.એમ.રાઠોડની ટીમે ટેકનિકલ સર્વેલન્સના આધારે આરોપીને ઝડપી પાડવા કવાયત હાથ ધરી હતી, ત્યારે ગણતરીના સમયમાં જ પોલીસે આરોપીને ઝડપી પાડ્યો હતો. ખેડા જિલ્લાના વસો ગામના મંદિરના પૂજારીની ધરપકડ કરી છે. જેનું નામ પિયુષગીરી ઉર્ફે લાલભાઈ બળદેવગીરી ગૌસ્વામી હોવાનું પોલીસ તપાસમાં બહાર આવ્યું છે.

જોકે, પ્રાથમિક પૂછપરછમાં આરોપીએ અભદ્ર ટિપ્પણીઓ કરી હોવાની પોલીસ સમક્ષ કબૂલાત આપી છે, ત્યારે હાલ તો પોલીસ દ્વારા આરોપી વિરુદ્ધ કાયદેસરની કાર્યવાહી હાથ ધરવામાં આવી છે.