ભરૂચ શહેર અને જિલ્લામાં છેલ્લા ચાર દિવસથી વરસાદી માહોલ જોવા મળી રહ્યો હતો જોકે હવે વરસાદે વીરામ લીધો છે છેલ્લા 24 કલાકમાં ભરૂચ જિલ્લાના નવ પૈકી માત્ર એક જ તાલુકામાં નોંધપાત્ર વરસાદ નોંધાયો હતો. નેત્રંગ તાલુકામાં 10 mm વરસાદ નોંધાયો હતો. જ્યારે અન્ય તાલુકાઓ કોરાકટ રહ્યા હતા.
છેલ્લા ત્રણ દિવસ દરમિયાન નેત્રંગ પંથકમાં સૌથી વધુ વરસાદ ખાબકતા જળબમ્બકાર પરિસ્થિતિનું નિર્માણ થયું હતું ત્યારે મેઘરાજા હવે ખમૈયા કર્યા છે. નેત્રંગ પંથકમાં પૂરના પાણી ઓસરતા ઠેર ઠેર તારાજીના દ્રશ્યો જોવા મળી રહ્યા છે. અનેક માર્ગો તૂટી ગયા છે તો બીજી તરફ લોકોના ઘરમાંથી પાણી ઓસરતા ઘરવખરીને વ્યાપક નુકસાન પહોંચ્યું હતું ત્યારે સરકાર દ્વારા સર્વે કરાવી સહાય ચુકવવામાં આવે તેવી સ્થાનિકો માંગ કરી રહ્યા છે