• ઝઘડિયાના પાણેથા ગામના પ્રગતિશીલ ખેડૂતની સિદ્ધિ

• ખેડૂતે ગુજરાતમાં પ્રથમ વખત કરી બતાવી સફળ ખેતી

• બ્રાઝિલની નડાલ વેરાયટીની મોસંબીની સફળ ખેતી કરી

• નટાલ, વેસ્ટિન અને હેમરીન મોસંબીનું પણ વાવેતર કર્યું

• પ્રગતિશીલ ખેડૂત અન્ય ખેડૂતોને આપી રહ્યા છે પ્રેરણા 

ભરૂચ જિલ્લાના ઝઘડિયા તાલુકાના પાણેથા ગામના પ્રગતિશીલ ખેડૂતે ગુજરાતમાં પ્રથમ વખત બ્રાઝિલની નડાલ વેરાયટીની મોસંબીની સફળ ખેતી કરી અન્ય ખેડૂતોને પણ પ્રેરણા આપી રહ્યા છે.

મોસંબી એક ખાટા-મીઠા સ્વાદવાળું, રસાળ ફળ છે. તેનું શાસ્ત્રીય નામ સાઈટ્રસ લાઈમેટ્ટા છે. ભારતમાં આ ફળને મોસંબી, મૌસંબી કે મુસંબી જેવાં નામોથી ઓળખવામાં આવે છે. મોસંબી આપણા સ્વાસ્થ્ય માટે ફાયદાકારક છે. આપણે આપણા રોજિંદા જીવનમાં મોસંબીનો ઉપયોગ વિવિધ રીતે કરી શકીએ છે.

 મોસંબીમાં વિટામિન સી, ફાઇબર અને અન્ય ઘણા પોષક તત્વો ભરપૂર માત્રામાં હોય છે, જે આપણા શરીરને સ્વસ્થ રાખવામાં મદદ કરે છે. આમ તો ભારતના તમિલનાડુમાં આ ફળનું સૌપ્રથમ વાવેતર કરવામાં આવ્યું હતું. આજે ભારત ઉપરાંત વિશ્વના અન્ય દેશોમાં પણ મોસંબી ઉગાડવામાં આવે છે, ત્યારે ભરૂચ જિલ્લાના ઝઘડિયા તાલુકાના પાણેથા ગામના પ્રગતિશીલ ખેડૂતે પણ મોસંબીની સફળ ખેતી કરી બતાવી છે. એટલું જ નહીં, ખેડૂતે નવતર પ્રયોગ સાથે ગુજરાતમાં પ્રથમ વખત બ્રાઝિલ દેશના નડાલ વેરાયટીની મોસંબીનું વાવેતર કર્યું છે.

ખેડૂત ધીરેન્દ્ર દેસાઈએ જણાવ્યું હતું કે, હું છેલ્લા 35 વર્ષથી ખેતી કરું છું. પણ હવે અમારા વિસ્તારમાં નવા બાગાયત પાકના વિકાસ માટે પ્રથમ વખત બ્રાઝિલની નડાલ વેરાયટીની મોસંબીનું વાવેતર કર્યું છે. સાથે સાથે બ્રાઝિલની અન્ય વેરાયટીઓ નટાલ, વેસ્ટિન અને હેમરીનનું પણ વાવેતર કર્યું છે. આ છોડ એકવાર વાવેતર કર્યા પછી સતત 15 વર્ષ સુધી તેનું ઉત્પાદન આપે છે. બ્રાઝિલની ટેકનોલોજીના આધારે 300 રૂપિયાનો એક છોડ લાવી ખેતરમાં વાવેતર કર્યું છે. ખેતરની પડતર જગ્યામાં મલ્ટીપલ ફાર્મિગ કરી પાણેથા ગામના પ્રગતિશીલ અન્ય ખેડૂતોને પણ પ્રેરણા આપી રહ્યા છે.